Украинанинг Лондондаги элчиси ва Украина Қуролли кучларининг собиқ бош қўмондони Валерий Залужний НАТО ҳақида фикр билдириб, альянс ҳозир ҳам «Иккинчи жаҳон уруши даври доктринаси» асосида фаолият юритаётганини, Украина Қуролли кучлари эса технологик жиҳатдан ундан илгарилаб кетганини айтди. Бу фикрни у аввалроқ айтган «Украина ҳеч қачон НАТОга кирмайди» деган сўзларига ҳамда Киев янги иттифоқлар излаш зарурлиги ҳақидаги баёнотларига изоҳ берар экан, билдирди.
«Мен НАТО тарафдориман», — деди Залужний. У эслатишича, 2019 йилда Украина Қуролли кучларини НАТО стандартларига ўтказиш ислоҳотининг асосий тарафдорларидан бири бўлган ва ушбу ислоҳотни шахсан ишлаб чиққан. Бироқ унинг таъкидлашича, илмий-техник тараққиёт ҳамда давом этаётган уруш Украина Қуролли кучларини мутлақо янги босқичга олиб чиққан.
«Энди НАТОнинг бошқа йўли йўқ — у бутунлай янги стандартларга ўтиши ва мутлақо янги ҳарбий доктринани ишлаб чиқиши керак. Ана шундан кейингина НАТО Украинанинг альянсга қўшилишига тайёр бўлади», — деди Залужний. У, шунингдек, Буюк Британияда мунтазам равишда ўтказиладиган НАТОнинг қўмондонлик-штаб машғулотларида қатнашиб туришини қўшимча қилди.
Собиқ бош қўмондон яна бир бор Киевга «Европага ҳудудий жиҳатдан боғланган мутлақо янги ҳарбий-сиёсий блок» зарурлигини таъкидлади. Мисол сифатида у Joint Expeditionary Force (JEF) — Бирлашган Экспедицион Кучларни келтирди. Ушбу тузилма таркибига Буюк Британия, Дания, Финляндия, Эстония, Исландия, Латвия, Литва, Нидерландия, Швеция ва Норвегия киради.
Саудия Арабистони валиаҳд шаҳзодаси Трампни Эронга қарши бошқа ҳужумлар уюштирмасликка чақирди
Президент таътилдан уйига қайтаётганда автоҳалокатга учради
Юлия Мендель Зеленскийни ёлғон ваъдалар ва ҳокимиятда қолиш учун урушдан фойдаланишда айблади
