Трамп Пентагон раҳбаридан тушунтириш талаб қилди

Бунга Эрон билан уруш ортидан АҚШ Қуролли кучларида ракеталар етишмовчилиги юзага келгани сабаб бўлган, деб ёзмоқда The Washington Post.

АҚШ президенти Доналд Трампнинг эътирози ўтган ҳафта ўтказилган йиғилишда билдирилган. У ўқ-дорилар тақчиллиги муаммоси аллақачон бартараф этилган деб ўйлаганини айтган. Пентагон раҳбари Пит Ҳегсет президент қаршисида ўзини оқлашга уриниб, етарли маълумот берилмагани учун айбни ўринбосари Стивен Файнбергга юклаган.

Қайд этилишича, айнан қурол-яроғ танқислиги Трампнинг сўнгги кунларда Эронга қарши янги зарбалар беришдан воз кечишига сабаб бўлган.

Оқ уй матбуот котиби Кэролин Левитт бу маълумотларга муносабат билдириб, учрашувда бундай ҳолат юз бермаганини айтди. Пентагон ҳам Трамп ва Ҳегсет ўртасидаги жанжал ҳақидаги хабарларни уйдирма деб атади.

Шунга қарамай, АҚШ Уруш вазирлиги ўтган ҳафта охирида Конгрессдан Эрон билан уруш харажатларини қоплаш ҳамда қурол-яроғ захираларини тиклаш учун қўшимча 67 миллиард доллар сўради. CNN ва Стратегик ҳамда халқаро тадқиқотлар маркази (CSIS) маълумотларига кўра, ушбу захираларнинг бир қисми кескин даражада камайиб кетган.

CSIS ҳисоб-китобларига кўра, АҚШ 27 февралдан 27 июлгача бўлган даврда Эрон билан уруш чоғида 1,5 мингдан 1,6 минггача Патриот ракетаси ва 200 га яқин THAAD тутиб олувчи ракеталарини сарфлаган. Натижада Patriot захиралари 2,3 мингдан тахминан 760–830 донагача, THAAD арсенали эса 452 тадан 234–278 донагача қисқарган ва бу ҳаво ҳужумидан мудофаа воситаларининг сезиларли тақчиллигига олиб келган. Бундан ташқари, манбаларнинг хабар беришича, АҚШ ATACMS ва PrSM ракеталарининг “деярли барчасини” ишлатиб бўлган.