Туркия болаларнинг ижтимоий тармоқлардан фойдаланишига чекловлар қўймоқда

Туркияда болаларнинг ижтимоий тармоқлардан фойдаланишига чекловлар 1 ноябрдан кучга киради.

Тегишли қоида Туркия Президентлигининг Киберхавфсизлик бошқармаси томонидан тайёрланган ва 10 октябрь куни расмий ҳукумат газетасида эълон қилинди.

Ҳужжатда чекловлар жорий йилнинг 1 ноябридан кучга кириши айтилган. Қоидаларга кўра, ижтимоий медиа платформалари 15 ёшгача бўлган болаларга хизмат кўрсата олмайди. 15-18 ёшдаги фойдаланувчилар учун платформалар кучайтирилган хавфсизлик ва махфийлик чоралари билан алоҳида режим яратиши керак. Мавжуд ва фаол фойдаланиладиган аккаунтлар учун ёшни текшириш 2027 йил 31 мартгача якунланиши керак.

Фойдаланувчиларнинг ёши миллий электрон ҳукумат тизими, e-Devlet орқали махсус идентификатор ёрдамида тасдиқланади. 15-18 ёшдаги ўсмирларнинг аккаунтлари сукут бўйича шахсий бўлади. Улар учун жонли эфир, шахсийлаштирилган реклама ва маълум контент тавсия қилиш механизмлари тақиқланади.

Ижтимоий тармоқлар ҳам тўпланган маълумотлар асосида вояга етмаганларга бошқа аккаунтларни тавсия қила олмайди. Бундан ташқари, вояга етмаганларнинг профилларини бошқа фойдаланувчиларга таклиф қилиш ҳам тақиқланади.

Бундан ташқари, вояга етмаганларнинг шахсий хавфсизлигини ҳимоя қилиш қоидалари кучайтирилмоқда. Ижтимоий тармоқлар болаларнинг аккаунтларини телефон китоблари, алоқа рўйхатлари, электрон почта манзиллари китоблари, шунингдек, бошқа илова ва платформалардаги дўстлар ва обуна рўйхатлари билан синхронлаштира олмайди. Ушбу манбаларга кириш ва улардан олинган маълумотларни қайта ишлаш ҳам тақиқланади.

Қоида шунингдек, ижтимоий тармоқлардан ота-оналар ва васийлар учун махсус бошқарув воситаларини яратиш ва тақдим этишни талаб қилади. Бу уларга аккаунтларни, уларнинг созламаларини, фойдаланиш вақтини, геолокацияни, тўлов операцияларини ва бошқа функцияларни бошқариш имконини беради.