Туркий маданият ва мерос жамғармаси “Қозоқ адабиёти тарихи” китобини тақдим этди

2026 йил 26 октябрь куни 12-Боку халқаро китоб ярмаркаси доирасида Туркий маданият ва мерос жамғармаси томонидан “Туркий дунёнинг илмий хазиналари” китоблар туркумидан ўрин олган, филология фанлари доктори, профессор Низомий Таг‘исой муаллифлигидаги “Қозоқ адабиёти тарихи” номли янги нашрнинг тақдимоти ўтказилди.

“Қозоқ адабиёти тарихи” китоби адабиётшунослар, туркологлар, қиёсий адабиётшунослик соҳасидаги тадқиқотчилар, бакалавриат ва магистратура талабалари, докторантлар, шунингдек, қозоқ халқининг адабий-эстетик меросига қизиқувчи кенг китобхонлар оммасига мўлжалланган.

Озарбайжон Ёзувчилар уюшмаси Ёшлар кенгаши раиси Фарид Ҳусайн модераторлигида ўтказилган тақдимот маросимида Туркий маданият ва мерос жамғармаси президенти, профессор Актоти Раимкулова, китоб муаллифи Низомий Таг‘исой, Озарбайжон Тиллар университети Озарбайжон адабиёти кафедраси мудири, академик Мухтор Иманов, филология фанлари бўйича фалсафа доктори, шоир Одил Жамил ҳамда филология фанлари доктори, профессор Сейфаддин Рзасой сўзга чиқиб, нашрнинг илмий ва адабий аҳамиятини алоҳида таъкидладилар.

Тадбирни очиб берган Туркий маданият ва мерос жамғармаси президенти, профессор Актоти Раимкулова қозоқ адабиётини тизимли ўрганиш, шунингдек, туркий дунёнинг муштарак адабий ва маданий меросини тарғиб этишда мазкур нашрнинг аҳамиятига тўхталди.

Актоти Раимкулованинг таъкидлашича, профессор Низомий Таг‘исой муаллифлигидаги “Қозоқ адабиёти тарихи” китобида қадимги даврлардан то ҳозирги кунгача бўлган қозоқ адабиёти тарихи, унинг ривожланиш босқичлари, атоқли адиб ва ижодкорларнинг ҳаёти ҳамда ижодий ютуқлари изчил ва хронологик тартибда ёритилган. Шунингдек, нашрда қозоқ халқининг маданий тафаккурига оид турли жиҳатлар, жумладан, жиров ва оқин шоирлар ижодига хос адабий анъаналар тизимли ҳамда концептуал жиҳатдан таҳлил қилинган.

Жамғарма президенти бу каби илмий нашрлар туркий халқлар адабиёти тарихини чуқурроқ англаш ва ўрганишда муҳим манба бўлиб хизмат қилишини қайд этди.

Шунингдек, жамғарма президенти муаллифнинг мазкур китобни яратиш йўлида олиб борган 40 йиллик илмий фаолиятига ҳурмат ва эҳтиром билдириб, Низомий Таг‘исойни янги нашр билан табриклади. Шундан сўнг Туркий маданият ва мерос жамғармаси номидан Низомий Таг‘исойга қозоқ халқининг анъанавий миллий кийими — чопон совға қилинди.

Китоб муаллифи, профессор Низомий Таг‘исой ўз нутқида нашрнинг мазмун-моҳияти, илмий мақсадлари ва тадқиқотнинг асосий йўналишлари ҳақида маълумот берди. У қозоқ адабиётининг тарихий тараққиёт босқичларини, унинг атоқли намояндалари ижодий меросини ҳамда қозоқ халқининг адабий-эстетик тафаккурини ўрганиш муҳимлигини таъкидлади.

Тадбирнинг бадиий дастури доирасида Серик Нурмолдаев ва Жадра Мусрепова томонидан қозоқ халқининг анъанавий мусиқий асарлари ижро этилди. Мусиқий чиқишлар дўмбира ва жетиген чолғу асбоблари жўрлигида намойиш қилинди.

Тадбир якунида иштирокчиларга муаллиф дастхати туширилган янги нашр нусхалари топширилди ҳамда эсдалик учун жамоавий суратлар олинди.