Трампнинг миллий хавфсизлик бўйича маслаҳатчиси Украинани "овозини пасайтиришга" чақирди

Шу билан бирга, Майкл Уолц Киевга тақдим этилган битим “Вашингтоннинг хавфсизлик кафолати” деб билишини таъкидлаган.

"Қўшма Штатлар Украинага қилган яхшиликлар инобатга олинса, Киев “овозини пасайтириши”, битимни синчковлик билан кўриб чиқиши ва уни имзолаши керак", – дея фикр билдирди Уолц Fox News телеканали эфирида.

Унинг сўзларига кўра, Оқ уй Киевнинг ушбу келишувни рад этганидан ажабланган, чунки Вашингтон буни Украинага "АҚШни иқтисодий шерик ва хавфсизлик кафолати сифатида" жалб қилиш учун тарихий имконият деб билади.

"Биз Украинанинг хавфсизлиги учун жуда кўп иш қилдик. Энди биз ёрдам шаклини ўзгартирмоқчи бўлсак, бу ҳеч кимни хафа қилмаслиги керак. Президент Трамп бу урушни тугатиш ниятида", – дея фикр билдирди Трампнинг маслаҳатчиси.

Уолцнинг сўзларига кўра, Трамп Украинани музокаралар столида ушлаб туришни хоҳлайди ва унинг Путинга қўнғироқ қилгани Россияга мойилликни англатмайди.