Трампнинг Эронга ҳужум ҳақидаги қарори партиясини бўлиб юбориши мумкин

АҚШ президенти Дональд Трамп томонидан Эроннинг ядровий объектларига зарба бериш қарорини “конституцияга зид” деб атаган Кентукки штати вакили, республикачи Томас Масси Трампнинг ҳаракатлари партияга сиёсий зарар келтириши мумкинлигини айтди.

CNN телеканалида “Inside Politics Sunday” дастурида гапирган Масси шундай деди:

“Трамп 2026 йилда сайловда қатнашмайди, лекин унинг Эрондаги ҳаракатлари партияни бўлиб ташлайди. Бу оралиқ сайловларда бизга қаттиқ таъсир қилади. Фақат шу битта масала ортидан кўпчиликни йўқотишимиз мумкин.”

Унинг сўзларига кўра, сайловчилар умидсиз, бефарқ бўлиб қолади, овоз беришга келмайди, натижада демократлар кўпчиликни қўлга киритиб, Трампни яна импичмент қилишлари мумкин.

“Бу нафақат сиёсий жиҳатдан ёмон қарор, балки юридик, конституцион ва сиёсат нуқтаи назаридан ҳам нотўғри”, — деди Масси.

У шунингдек, Трамп ўз сайловолди ваъдасини бузганини таъкидлади:

“Трамп урушларга киришмайман деганди. Эрондаги ҳаракатлар шу ваъдага зид. Айрим республикачи сайловчилар буни кўряпти, лекин Конгрессдаги GOP аъзолари танқид қилишдан қўрқади — чунки улар Трампдан ва Исроил лоббисидан чўчишади.”

Масси спикер Майк Жонсоннинг шанба куни айтган гапини ҳам танқид қилди. Жонсон “Президент хавф даражасини Конгресс ҳаракат қилгунича кутишдан кўра устун деб баҳолади” деган эди.

Масси бу ҳақда шундай деди:

“Агар хавф жуда жиддий бўлган бўлса, нега Спикер Жонсон биз Конгресс аъзоларини таътилдан чақирмади? Охирги ҳафтада Палата сессияда эмасди.”

Масси ўзининг икки партия томонидан қўллаб-қувватланаётган резолюциясини тақдим этаётганини эълон қилди. Бу резолюция президентнинг уруш ваколатларини чеклашга қаратилган бўлиб, у бу ҳафта овозга қўйилишини таъминламоқчи.

“Президент Конгресс овозисиз фақат 60 кунлик муддатда ҳаракат қилолади. Шундан кейин, агар овоз бериш бўлмаса, у тўхташи керак. Шунинг учун, бир пайт келиб овоз беришга мажбур бўламиз — агар Спикер Жонсон Қоидалар қўмитасида қандайдир айёрлик қилиб қолмаса”, — деди у.