Трампнинг бошига ҳам Байденнинг куни тушди

АҚШ президенти Доналд Трамп яна мамлакатлар номини чалкаштириб юборди.

“Биз Камбоджа ва Арманистон ўртасидаги зиддиятни тўхтатдик. У эндигина бошланган ва жуда ёмон ихтилоф эди. Буни ўйлаб кўринглар”, – деган Трамп 20 сентябрь куни АҚШнинг Cornerstone институти ташкил этган тадбирдаги чиқишида.

Дунёдаги кўплаб урушларни тўхтатганини иддао қилиб келаётган Трамп бу ўринда Камбоджа ва Таиланд ёки Озарбайжон ва Арманистон ўртасидаги зиддиятни бартараф этгани ҳақида гапирмоқчи бўлганини тахмин қилиш мумкин.

АҚШ президенти 18 сентябрь куни Буюк Британия бош вазири Кир Стармер билан биргаликдаги матбуот анжуманида ҳам урушларни тўхтатаётгани ҳақида мақтанар экан, қовун туширган, яъни “Озарбайжон ва Арманистон ўртасидаги зиддият” дейиш ўрнига “Обарбайжон ва Албания ўртасидаги зиддият” деган эди.

79 ёшли Трамп сўнгги вақтларда давлатлар номлари, жуғрофий атамалар борасида бир неча бор хатоликка йўл қўйди.

Сиёсатчи жорий йил 20 август куни журналист Марк Левинга берган интервьюсида Қрим ҳақида чалкаш фикрни илгари сурган. Жумладан, Қрим соҳилини океан ювиб туриши, Қрим катталиги бўйича Техас штатига тенг эканини айтган.

Аслида, Қрим соҳилини океан эмас, балки Қора денгиз ювиб туради. Қолаверса, 27 минг квадрат метр майдонни эгаллаган мазкур ярим орол ҳудуди бўйича Техас штатидан ўн баравар кичкинадир.

Трамп август ойида ўтказилган брифингда ҳам Путин билан учрашгани Россияга кетаётгани ҳақида гапирган. Оқ уй мулозимлари кейинроқ “Президент аслида Аляскада, яъни АҚШ ҳудудида ўтадиган учрашув ҳақида гапирди” дея изоҳ беришга мажбур бўлган.

Июль ойида эса Либерия президенти Жозеф Боакайнинг инглизчада мукаммал гапиришидан ҳайратга тушган Трамп ундан бунчалик чиройли гапиришни қаерда ўрганганини сўраган. Яъни АҚШ етакчиси Либерияда давлат тили инглиз тили эканини ё билмаган, ёки унутган.

Трампнинг бу каби хатолари ортидан ижтимоий тармоқларда унинг ақлий салоҳияти борасида саволлар янграмоқда.

Эслатиб ўтамиз, Трамп ўтган йили президентлик сайлови кампанияси даврида бир муддат унга рақиблик қилган собиқ президент Жо Байденнинг пойинтар-сойинтар гаплари сабаб унинг ақлий қобилиятини қайта-қайта шубҳа остига олган эди. Шунингдек, у Байденни ақлий қобилиятни аниқловчи тестдан биргаликда ўтишга чақирганди.

Трамп Байденни “мамлакат тарихидаги энг ёмон президент” деб ҳам атаганди.

Август ойи охирида ижтимоий тармоқларда Доналд Трамп вафот этгани ҳақида миш-миш тарқалган ва кейинроқ у рад этилган эди.

Аммо Оқ уй тиббий ҳисоботида АҚШ президентида веноз етишмовчилиги ташхиси қайд этилгани маълум. Оммавий ахборот воситалари Трампнинг қўлида кўкаришни ҳам фаол муҳокама қилган.

Дарвоқе, ақлий салоҳият борасида тобора бир-бирига ўхшаб бораётган Трамп ва Байденни мол-давлат борасида бир-бирига муқояса этиб бўлмайди.

Аввал хабар берганимиздек, Байден президентликдан кетгач қўли калталик важидан камтарона ҳаёт кечиришга мажбур бўлмоқда.

Трамп эса ҳашамат ва дабдабага кўмилиб яшамоқда. “Forbes” нашри ёзишича, Трампнинг бойлиги рекорд даражага (7,3 миллиард доллар) етган. Жумладан, президентлик даврида унинг бойлигига 3 миллиард доллар қўшилган.