Трампга суиқасд уюштиришга уринишлар одатий ҳолга айланиб бормоқда

АҚШ президенти Дональд Трампга суиқасд уринишлари "одатий ҳолга" айланиб бормоқда, деди АҚШ Вакиллар палатаси спикери Майк Жонсон.

Жонсон бу баёнотни Fox News телеканалида Оқ уй яқинида содир бўлган отишмага жавобан айтган.

"Президентга қарши учта суиқасд уриниши бўлган. Мен улардан иккитасида у билан бирга эдим ва бу жуда кенг тарқалган ҳолга айланиб бормоқда", деди у.

Жонсоннинг сўзларига кўра, Трамп бундай таҳдидларни "ишнинг бир қисми" деб билади.

У шунингдек, мамлакатдаги сиёсий кескинликни камайтириш зарурлигини таъкидлади ва Демократик партия аъзоларини рақиблари ҳақида қўпол баёнотлар беришдан тийилишга чақирди.

"Сиз бошқа томонни ёмон кўриб, уларни нацистлар деб атай олмайсиз, президентни демократияга таҳдид деб атай олмайсиз ва бу баъзи ақлдан озган одамларни қўзғатмайди деб ўйлай олмайсиз", деб қўшимча қилди спикер.