Трамп Зеленскийдан Россия нефт заводларига ҳужумларни тўхтатишни кутмоқда

АҚШ президенти Доналд Трамп Украина Россиянинг нефтни қайта ишлаш заводларига ҳужумларни тўхтатиб, энергетик сулҳга риоя қилишини кутмоқда. Бу ҳақда Axios нашри Оқ уйдаги манбаларига таяниб хабар берди.

Манбаларга кўра, Трамп Россия нефт заводларига зарбалар АҚШда бензин нархининг ошишига сабаб бўлаётган деб ҳисоблайди. У Украина президенти Владимир Зеленскийдан норози экани ва Зеленский АҚШ ёрдамини одатий ҳол деб қабул қилаётганини таъкидлаётгани айтилган.

Таклиф Россия ва Украинанинг нефтни қайта ишлаш заводларига ўзаро ҳужумларни тўхтатишини назарда тутади. Кейинчалик келишувни электр станциялари ва энергетика тармоқларига ҳам татбиқ этиш мумкин.

Украиналик расмий таклиф тенг шартларни назарда тутмаслигини билдирган. Унинг айтишича, Украинадаги ягона нефтни қайта ишлаш заводи Россиянинг такрорий ҳужумлари сабабли тўлиқ қувватда ишламаяпти.

Россия ҳозирча энергетик сулҳ таклифига жавоб бермаган. Axios манбасига кўра, Москва таклифни кўриб чиқмоқда ва яқин орада қарорини маълум қилиши мумкин.