Трамп вакилининг таклифи рад этилди: ФИФА Эрон терма жамоасини қўллаб-қувватлади

ФИФА шу ёзда бўлиб ўтадиган Жаҳон чемпионатида Эрон терма жамоасини Италияга алмаштириш ниятида эмас. Бу ҳақда BBC турли манбаларга таянган ҳолда хабар бермоқда.

Аввалроқ АҚШ президенти Дональд Трампнинг махсус вакили Паоло Дзамполли шундай таклиф билан чиққан эди. АҚШ ва Исроил билан бўлаётган уруш сабабли, Эроннинг турнирдаги иштироки борасида мавҳумлик сақланиб қолмоқда. ФИФА Дзамполлининг таклифига расмий муносабат билдирмади, бироқ ташкилот президенти Жанни Инфантинонинг ўтган ҳафтадаги баёнотига ишора қилди. Ўшанда Инфантино: «Эрон жамоаси албатта келади», — деб айтган эди.

Financial Times газетасининг ёзишича, Дзамполлининг ушбу режаси АҚШ ва Италия ўртасидаги келишмовчиликларни ҳал қилиш учун таклиф этилган. Бу келишмовчиликлар Италия Бош вазири Жоржия Мелони Трампнинг Рим папаси Лев XIV ҳақидаги фикрларини танқид қилганидан кейин юзага келган эди.

ФИФА қоидаларига кўра, агар бирор жамоа иштирок этишдан бош тортса ёки турнирдан четлаштирилса, ташкилот раҳбарияти кейинги чоралар бўйича «мутлақ ҳуқуқ»га эга. Жаҳон чемпионати регламентининг олтинчи моддасида шундай дейилган: «ФИФА тегишли иштирокчи ассоциацияни бошқа бир ассоциация билан алмаштириш ҳақида қарор қабул қилиши мумкин».

Эслатиб ўтамиз, Италия терма жамоаси саралашнинг плей-офф босқичида Босния ва Герцеговинага имкониятни бой бериб, қаторасига учинчи бор Жаҳон чемпионати йўлланмасисиз қолган эди.