Трамп Украинага хитойлик тинчликпарварларни жалб қилишни таклиф қилган – FT

АҚШ президенти Доналд Трамп ўтган ҳафта Оқ уйда Европа етакчилари ва Украина президенти билан бўлиб ўтган учрашувда 1 300 километрга чўзилган фронт чизиғи бўйлаб нейтрал ҳудудни назорат қилиш учун хитойлик тинчликпарварларни жалб қилиш ғоясини илгари сурган.

Бу ҳақда Financial Times нашри хабар бермоқда.

Бироқ Оқ уй бундай режалар мавжудлигини инкор этди. Хитой ҳукумати ҳам бу ҳақдаги хабарларни ҳақиқатга тўғри келмаслигини маълум қилди.

«Ушбу хабар ҳақиқатга тўғри келмайди. Хитойлик тинчликпарварлар масаласи умуман муҳокама қилинмаган», – дейди АҚШ маъмуриятидаги юқори лавозимли амалдор.

FT нашрининг эслатишича, Кремл хитойлик тинчликпарварларни жалб қилиш ғоясини илк бор 2022 йил баҳорида, Россиянинг кенг кўламли босқинидан кўп ўтмай Москва ва Киев ўртасидаги Истанбулдаги музокаралар чоғида илгари сурган эди.

Бу ғояга Европа мамлакатлари ҳамда Украина президенти Володимир Зеленский қарши чиққан.