АҚШ президенти Доналд Трамп Россия раҳбари Владимир Путин билан суҳбатлашгандан сўнг, Россиянинг Украинага қарши урушда ғалаба қозонишига ишонч билдирди. Бу ҳақда Bloomberg манбаларга асосланиб хабар бермоқда.
Нашр маълумотларига кўра, Трамп бу фикрни кейинчалик Европа давлат раҳбарлари билан бўлган суҳбатда ҳам такрорлаган. Агентлик хабар қилишича, Трамп Кремлнинг бир неча ғояларини қайтариб, суҳбатдошларига Россиянинг урушдаги ҳарбий устунлиги ҳақидаги қарашга мойиллигини англатган.
Путин ва Трамп ўртасидаги суҳбат 19 май куни кечқурун бўлиб ўтди ва бу Трамп Оқ уйга қайтганидан кейинги учинчи мулоқот эди. Президентлар Россия-Украина уруши ҳамда икки давлат ўртасидаги муносабатларни муҳокама қилди. Ушбу суҳбат Россия ва Украинанинг Истанбулдаги тўғридан-тўғри музокараларидан бир неча кун ўтиб - сўнгги уч йил ичида илк бор ўтказилди.
Трамп Путин билан суҳбатлашгандан сўнг Украина президенти Владимир Зеленский билан телефон орқали боғланди. Зеленский билан Трамп россиялик ҳамкасби билан музокаралардан олдин ҳам гаплашган эди. Бундан ташқари, Трамп Путин билан бўлган суҳбати ҳақида Франция ва Финляндия президентлари Эммануэл Макрон ва Александр Стубб, Европа Комиссияси раиси Урсула фон дер Ляен, Италия бош вазири Жоржа Мелони ва Германия канцлери Фридрих Мерсга маълумот берди.
The New York Times газетасининг олтита манбаси хабар беришича, Трамп Зеленский ва Европа раҳбарларига Россия ва Украина ҳарбий можарони мустақил равишда ҳал қилишлари кераклигини айтган. Нашрнинг таъкидлашича, у шунингдек, санкцияларни кучайтириш каби Россияга босим ўтказиш масаласида Европа мамлакатларига қўшилиш бўйича ўз таҳдидларидан воз кечган.
Марказий Осиё халқлари учун Россия энди қизиқ эмас
"Ким Чен Инни суд қилиш вақти келди"
Россия ўт очишни тўхтатиш учун иккита шартни илгари сурмоқда — Bild
