Трамп Россияга қарши санкцияларни кучайтириш ҳақидаги қонун лойиҳасига “яшил чироқ” ёқди

Бу ҳақда қонун лойиҳасининг ҳаммуаллифи, сенатор Линдси Грэм маълум қилди. Унинг айтишича, ҳужжат бўйича овоз бериш келаси ҳафтадаёқ бўлиб ўтиши мумкин.

Россияга қарши иккиламчи санкцияларни назарда тутувчи икки партиявий қонун лойиҳаси республикачи Линдси Грэм ва демократ Ричард Блюментал томонидан 2025 йил баҳорида тақдим этилган. Ҳужжат Россия нефти ва газини сотиб олаётган мамлакатлардан импорт қилинадиган маҳсулотларга 500 фоизлик божлар жорий этилишини кўзда тутади.

Грэмнинг таъкидлашича, қонун лойиҳаси президент Трампга Путинни Украина билан урушни якунлашга ундаш учун кўпроқ ваколатлар беради. У ёз ойларидаёқ Трамп ҳужжатни қўллаб-қувватлашга тайёр эканини билдирган эди, бироқ АҚШ ва Россия ўртасида Аляскада бўлиб ўтган тинчлик музокаралари фонида қонун лойиҳаси устидаги ишлар вақтинча тўхтатилган.

Ноябр ойида Reuters агентлиги Трамп агар у барча чекловлар бўйича якуний қарор қабул қилиш ҳуқуқини ўзида сақлаб қолса, қонун лойиҳасини имзолашга тайёр эканини хабар қилган эди.