Трамп Россия Украинага нисбатан анча қулай позицияда эканини айтди

"Бунга ҳеч қандай шубҳа йўқ, Россия улкан ҳудуди ва ресурслари сабаб анча устун ҳолатда, Украина эса ютқазмоқда. Украина кўп ҳудудларни йўқотди ва буни ғалаба деб бўлмайди", — деди АҚШ президенти Politico нашрига берган интервюсида.

Интервюда Доналд Трамп томонидан билдирилган бошқа фикрлар:

◾️ Зеленский муросага келиши керак, чунки Украина ютқазмоқда;

◾️ Зеленский тинчлик режасини блоклаб турибди, чунки у режанинг сўнгги вариантини ҳали ўқимаган;

◾️ Украинадаги низони тартибга солиш бўйича сўнгги таклиф Зеленский жамоасидаги юқори мартабали амалдорларга маъқул бўлган;

◾️ Агар ўша пайтда мен президент бўлганимда, Украина уруши ҳеч қачон бошланмас эди;

◾️ Сўнгги бир ойда Украина 27 минг аскарини йўқотди;

◾️ Агар Украина Қўшма Штатларнинг тинчлик режасини рад этса, АҚШ Киевни доимий равишда қўллаб-қувватламайди;

◾️ Путиннинг Зеленскийни ёмон кўриши сабаб келишувга эришиш қийин. Путин ва Зеленский ўртасидаги нафрат даражаси жуда юқори;

◾️ Европа заиф ва ўз мудофаасини таъминлай олмайди, иммиграция эса уни парчаламоқда. Агар вазият шу тарзда давом этса, бу давлатларнинг кўпчилиги яшаш учун яроқсиз бўлиб қолиши мумкин;

◾️ Путин заиф Европани кўришни хоҳлайди ва у бунга эришяпти. Бу мен билан ҳеч қандай боғлиқлиги йўқ. Мен кучли Европани кўришни истайман;

◾️ Украина уруши ҳозир Европадаги энг долзарб муаммолардан биридир;

◾️ Украинадаги вазият учинчи жаҳон урушига айланиб кетиши мумкин эди, аммо, менинча, энди бундай бўлмайди;

◾️ Зеленский фирибгар Жо Байденни Киевга 350 млрд доллар беришга кўндирган ва натижада у мамлакатининг тахминан 25 фоизини йўқотди;

◾️ Менимча, Украина сайловлар ўтказиши керак. Улар урушдан сайлов ўтказмаслик учун баҳона сифатида фойдаланишмоқда, лекин Украина халқи бундай танловга эга бўлиши керак. Агар сайлов ўтказилса, балки унда Зеленский ютарди. Улар демократия ҳақида гапиришади, аммо бу демократия эмас;

◾️ Венесуэла етакчиси Николас Мадуронинг саноқли кунлари қолган;

◾️ Биласизми, мен ич-ичимдан риелторхонман, тўғрими? Мен кўчмас мулкни жуда яхши тушунаман. Ҳар сафар харитага қараганимда: “Оҳ, Қрим жуда чиройли”, дейман. У тўрт томондан океан билан ўралган. Унда қуруқликнинг асосий қисмига чиқиш учун фақатгина кичкина йўлак бор. Қиримни Россияга АҚШнинг ўша даврдаги президенти Барак Обама бериб юборган;

◾️ Мен Қўшма Штатларни бошқаришни хоҳлайман, Европани эмас;

◾️ NATO'да мени “отажон” деб чақиришади. Бу борада айтадиган гапларим бор. Биласизми, мен NATO бадалларини ЯИМнинг 2 фоизидан 5 фоизигача кўтардим, улар буни тўлаяпти. Чунки биз уларга қуролларни етказиб берганимизда, бунинг учун алянс тўлайди ва, чамамда, улар қуролларни Украинага юборишади.