Трамп: "Россия-Украина уруши ҳали бери тугамайди"

Россия-Украина уруши тез орада тугамайди.

Бу ҳақда АҚШ президенти Дональд Трамп украиналик ҳамкасби Владимир Зеленский билан Нью-Йоркда БМТ Бош Ассамблеясининг 80-сессияси доирасидаги қўшма брифингда маълум қилди.

"Россия у қадар зўр кўринмайди. Бу улар учун тез бўлиши керак. Кўриниб турибдики, бу узоқ вақт тугамайдиганга ўхшайди", - деди АҚШ президенти.

Трампнинг фикрича, Россия иқтисодиёти таназзулга юз тутмоқда ва бу тинчлик жараёнидаги ютуқ: "Энг катта тараққиёт Россия иқтисодидир. У даҳшатли ҳолатда. Вайронага айланмоқда. Очиғини айтганда, Украина армияси бу катта армияни тўхтатиш учун яхши иш қиляпти".

Вашингтон маъмурияти раҳбарининг қўшимча қилишича, Хитой ва Ҳиндистон Россия нефтини харид қилишда давом этар экан, Украинадаги урушнинг “асосий ҳомийлари”дир. Трамп, шунингдек, Венгрия бош вазири Виктор Орбан билан гаплашиб, уни Россия нефтини сотиб олишни тўхтатишга кўндиришини ҳам истисно этмади.