"Вашингтон Хитойнинг DeepSeek сунъий интеллект чат-ботига ва ушбу тизимда ишлатилган чипларни ишлаб чиқарувчи етакчи Америка компанияси Nvidia'га нисбатан чеклов чораларини кўриб чиқмоқда", деб ёзади газета манбаларига таяниб.
Манбаларга кўра, АҚШ маъмурияти аллақачон Nvidia чипларининг Хитойга сотилишини чеклаб қўйган. Энди эса DeepSeek компаниясининг Америка технологияларини сотиб олишини тақиқловчи санкциялар жорий этилиши ва америкаликларга DeepSeek'дан фойдаланишни тақиқлаш имконияти муҳокама қилинмоқда.
DeepSeek компанияси январ ойида DeepSeek-V3 номли янги сунъий интеллект тизимини тақдим этганди. Бу тизим илғор технологиялар билан бемалол рақобатлаша олади. DeepSeek вакилларининг айтишича, улар ушбу моделни атиги икки ой ичида яратган ва бунга олти миллион доллардан кам маблағ сарфлаган. Ҳолбуки, АҚШ компаниялари сунъий интеллект тизимлари учун ўнлаб баробар кўпроқ харажат қилмоқда. DeepSeek ишга тушганидан сўнг, “маълумотлар хавфсизлигини таъминлаш” мақсадида Италия ҳукумати уни мамлакат ҳудудида блоклаган эди.
