Трамп жамоаси Гренландияни сақлаш харажатларини аниқлашга ҳаракат қилмоқда

Вашингтон Гренландияни Қўшма Штатлар таркибида сақлаб қолишнинг мумкин бўлган харажатларини баҳолашни тайёрламоқда, оролни аннекция қилиш ва унинг аҳолисига давлат хизматларини кўрсатишнинг молиявий таъсирини ҳисоблашга ҳаракат қилмоқда. Бу ҳақда The Washington Post ёзмоқда.

Март ойида АҚШ етакчиси Дональд Трамп Гренландия у ёки бу тарзда АҚШ назорати остида бўлишини айтган эди. У орол аҳолисига, агар улар Қўшма Штатларга қўшилса, бойлик ваъда қилган.

"Оқ уй Гренландия устидан назоратни ўз қўлига олиши учун федерал ҳукуматга тушадиган харажат сметасини тайёрламоқда. Оқ уй расмийлари сўнгги ҳафталарда Гренландиянинг АҚШ ҳудудига айланишининг молиявий оқибатларини, жумладан, унинг 58 минг аҳолисига давлат хизматларини кўрсатиш харажатларини аниқлаш учун чоралар кўрди", - дея қайд этади нашр.

Оқ уй бюджети расмийлари Вашингтон оролнинг табиий ресурсларидан қанча даромад олиши мумкинлигини ҳам аниқлашга ҳаракат қилмоқда, дейди манбалар. Шу билан бирга, The Washington Post қайд этганидек, Қўшма Штатлар Гренландия ҳукуматига Даниядан кўра қулайроқ шартнома таклиф қилиш вариантини кўриб чиқмоқда, ҳозирда у оролдаги хизматларни молиялаштириш учун йилига 600 миллион долларга яқин маблағ ажратмоқда. Номи ошкор этилмаган америкалик мулозимга кўра, Қўшма Штатлар кўпроқ нарсани таклиф қилади.

"Ички режалаштириш шуни кўрсатадики, маъмуриятнинг Гренландияни қўлга киритишга бўлган интилишлари президентнинг ўй-хаёлларидан ташқарига чиқмоқда ва ҳукумат сиёсатида ўз аксини топмоқда", - дея таъкидлайди The Washington Post.

АҚШ президенти Дональд Трамп ўтган йилнинг декабрь ойидан бери Гренландияни аннексия қилиш зарурлигини эълон қилиб келади. Бироқ, бу фикр кучли қаршиликка дуч келди. Оролдаги сиёсий партияларнинг ҳеч бири бундай ташаббусни қўллаб-қувватламайди ва маҳаллий аҳолининг катта қисми ҳам бу ғояни рад этади.