Трамп - Германия канцлерига: "АҚШда нефть ва газ шу даражада кўпки, унинг ҳаммасини сотиб ололмайсиз"

АҚШ президенти Дональд Трамп “Шимолий оқим 2” газ қувурига айнан ўзи нуқта қўйганини айтди.

Бу ҳақда у Оқ уйда Германиянинг янги канцлери Фридрих Мерц билан биринчи учрашувида айтиб ўтди.

"Ўйлаб кўрсангиз, Германияга кетадиган "Шимолий оқим 2" қурилишини мен тўхтатганман. Кечирасиз. Лекин мен "Шимолий оқим 2"га чек қўйдим. Буни бошқа ҳеч ким қилмаган", - дея таъкидлади Америка раҳбари.

Трампнинг қўшимча қилишича, биринчи президентлик муддати тугаши билан унинг ўрнига АҚШнинг собиқ етакчиси Жо Байден келганида, у ўзидан олдинги президентнинг ҳаракатларини дарҳол маъқуллаган.

"Бу моҳиятан Германия ва бошқа мамлакатларга кетадиган дунёдаги энг йирик қувур. Бизда нефть ва газ шунчалик кўпки, Германия ҳаммасини сотиб ололмайди", - дея давом этди сиёсатчи.

Трамп таъкидлаганидек, Вашингтон ва Берлин бу миқдордаги Америка ёқилғисидан савдо битимини тузиш учун фойдаланиши мумкин.

Мерц 28 май куни Берлинда Украина етакчиси Владимир Зеленский билан бўлиб ўтган матбуот анжуманида Германия ҳукумати "Шимолий оқим 2" газ қувурининг қайта тикланишига йўл қўймаслик учун ҳамма нарсани қилишини айтди. Мерцнинг таъкидлашича, Германия Россияга санкцияларни кучайтириш соҳасида босимни оширишда давом этади.