Трамп Европадаги NATO кучларида Америка қўмондонлигини сақлаб қолишни режалаштирмоқда — Reuters

Агентлик манбаларига кўра, бу Европа иттифоқчиларини тинчлантириш мақсадида амалга оширилади.

Доналд Трамп, Вашингтон Европа иттифоқчиларини хавфсизлик масалаларида кўпроқ жавобгарликни ўз зиммаларига олишга ундаётганига қарамай, алянснинг Европадаги Бирлашган Қуролли кучлари қўмондонлигида америкалик генерални сақлаб қолмоқчи.

"АҚШ президенти Доналд Трамп ушбу қарорини NATO бош котиби Марк Рюттега шахсий равишда билдирган. Ушбу қарор Европа иттифоқчиларини ва Қўшма Штатларнинг алянсдаги ҳарбий етакчилиги тез орада қисқариб кетишидан хавотирда бўлган айрим республикачиларни тинчлантиради", деб ёзади Reuters.

Ҳозирда NATO'нинг Европадаги Бирлашган Қуролли кучлари бош қўмондони лавозимини америкалик генерал Кристофер Каволи эгаллаб турибди.

Америкалик расмийларга кўра, ушбу лавозим учун кейинги кутилаётган номзод – АҚШ Қуролли Кучлари Бирлашган штаби операциялар бўйича директори, ҳарбий-ҳаво кучлари генерал-лейтенанти Алексус Гринкевич ҳисобланади.

"Иккинчи жаҳон урушидан буён бу лавозим доимий равишда америкалик генераллар томонидан эгаллаб келинмоқда", дея аниқлик киритди Reuters.