АҚШ ҳам Россияга “совға” тайёрламоқда

АҚШ Россияга қарши янги санкциялар пакетини тайёрлади. Бу ҳақда АҚШ президентининг Украина бўйича махсус вакили Кит Келлог маълум қилди.

“Мен (республикачи сенатор Линдси Грэм билан) дам олиш куни суҳбатлашдим. “Россияга қарши санкциялар тўғрисида”ги қонун тайёр экани ва яқин фурсатда эълон қилинишини маълум қилишди. Улар (яъни, янги санкциялар – таҳр.) анчагина оғир”, – деган АҚШ президентининг махсус вакили.

Сенаторлар Линдси Грэм ва Ричард Блюменталь ташаббуси билан ишлаб чиқилган қонун лойиҳасида Россиядан нефть, газ, уран ва бошқа маҳсулотларни сотиб оладиган мамлакатларга 500 фоиз миқдорида бож тўлови жорий этиш кўзда тутилган.

Украина президенти Владимир Зеленский ҳам бир неча кун олдин Россия тўлиқ оташкесимга рози бўлиши учун АҚШ президенти Доналд Трампни янги санкцияларни тасдиқлашга чақирган эди. Зеленскийга кўра, Россия раҳбарияти бундан бошқа усулни тушунмайди.

АҚШ қонунчилигига мувофиқ, ҳужжат Конгресс тасдиғидан ўтгач, президент томонидан маъқулланиши керак.

Аввалроқ Европа Иттифоқи ҳам Путиннинг урушни тўхтатишдан бош тортганига жавобан энергетика ва молия секторларига дахлдор янги санкциялар пакети жорий қилганди. Янги санкциялар тарихдаги энг кўламдор чеклов чоралари деб баҳоланган.

Президентлик сайлови даврида Россия – Украина урушини 24 соат ичида тугатишга ваъда берган Трамп Оқ уйга келганидан буён Путин билан бир неча бор телефонда суҳбатлашди.

Таҳлилчиларга кўра, Кремль Оқ уй таклиф этаётган тинчлик битимини қабул қилмай, турли-туман шартларни илгари сураётгани ва вақтни чўзаётгани сабаб Трампнинг Путиндан ҳафсаласи пир бўлмоқда.

Сўнгги икки ой мобайнида Кремль вакиллари ҳамда Путиннинг ўзи билан бир неча марта музокара ўтказган Оқ уй мулозимлари музокаралар боши берк кўчага кириб қолди деб ҳисоблайди.

Жаҳон матбуоти ёзишича, Трамп маъмурияти сахийларча таклифлар билан ҳам Украинани буткул босиб олишни кўзлаган Путинни сулҳга кўндира олмаётир.

Трамп аввалроқ Путиннинг Зеленский ҳокимияти легитимлигини шубҳа остига олганидан дарғазаб бўлганди.

Май ойи охирида Россия Украинага юзлаб ракета ва дрон билан ҳужум уюштиргани ортидан Трамп Путинни “ақлдан озгани” ҳақида ёзди.

Расмий Вашингтон Россия ва Украина музокараларда хайрихоҳлик кўрсатмаса, урушни тўхтатиш бўйича воситачи ролидан воз кечишидан ҳам огоҳлантирган.