Трамп дронлар Путиннинг қароргоҳига ҳужум қилган бўлса, бу “ёмон ҳодиса” ҳисобланишини айтди

АҚШ президенти Доналд Трамп Россия раҳбари Владимир Путин билан бўлиб ўтган суҳбатини самарали деб атади ва Путин унга Новгород вилоятидаги Валдай қароргоҳига Украина томонидан ҳужум бўлгани ҳақида айтганини билдирди.

"Бундай ҳаракатлар менга ёқмайди. Бу ёмон", — деди АҚШ президенти Исроил бош вазири Бинямин Нетаняҳу билан Флорида штатидаги Мар-а-Лаго қароргоҳида учрашуви олдидан.

Шу билан бирга, Трамп ҳужум ҳақидаги даъволар ёлғон бўлиши, умуман ҳужум қилинмаган бўлиши ҳам мумкинлигини тан олди, бироқ ҳужум ҳақда унга айнан Путин айтганини қўшимча қилди. Трампнинг таъкидлашича, у бу ҳақда эндигина хабар топган ва тафсилотларни билмайди.

"Биласизми, менга буни ким айтди? Президент Путин. У менга ўз қароргоҳига ҳужум бўлганини айтди. Бу ёмон. Ҳозир бундай ҳаракатлар учун мос вақт эмас", — дея қўшимча қилди у.

Аввалроқ Россия ТИВ раҳбари Лавров Украина Путиннинг Валдайдаги қароргоҳига 91 та дрон билан ҳужум қилганини айтган ва Москва бунга "муносиб жавоб" беришини билдирганди.

Украина президенти Володимир Зеленский эса бу айбловни рад этиб, Россия Украинага қарши янги ҳужумларга, жумладан Киевдаги ҳукумат биноларига зарбалар беришга ҳозирлик кўраётганини айтганди. Зеленский, шунингдек, Москва бу ёлғон айбловни "музокаралардан воз кечишни оқлаш" учун тарқатаётганини таъкидлади.