Трамп АҚШ Марказий разведка бошқармасига Венесуэлада махфий операциялар ўтказишга рухсат берди

Қўшма Штатлар президенти бу ҳақда Оқ уйда ўтказилган брифингда маълум қилди.

Доналд Трамп журналистнинг "Вашингтон Мадурони ҳокимиятдан ағдариш ниятидами?", деган саволга жавоб беришдан бош тортди.

Оқ уй раҳбарининг сўзларига кўра, у МРБга Венесуэла ҳудудида ҳаракат қилиш ваколатини берган, у буни Қўшма Штатларга ноқонуний муҳожирлар ва наркотик моддалар оқимини тўхтатиш истаги билан изоҳлади.

"Бизга Венесуэладан жуда кўп наркотиклар келади, уларнинг аксарияти денгиз орқали келтирилмоқда. Шунинг учун биз уларни қуруқликдаёқ тўхтатмоқчимиз. Венесуэла ҳукумати наркокартеллар фаолиятида иштирок этмоқда", — деди Оқ уй раҳбари журналистларга.

Журналистларнинг "Марказий разведка бошқармаси Николас Мадурони йўқ қилиш ваколатига эгами?", деган саволга АҚШ президенти шундай жавоб берди: "Бу менга берилган аҳмоқона савол. Тўғриси, унчалик бемаъни эмас, лекин менинг унга жавоб беришим беманилик бўларди, тўғрими?".

Аввалроқ Тhe New York Times газетаси Оқ уй Венесуэладаги инқирозни ҳарбий йўл билан кучайтириш, шу жумладан, Мадурони ҳокимиятдан мажбуран четлатиш каби бир неча сценарийларни ишлаб чиққани ҳақида хабар берган эди.