Трамп: "АҚШ Форс кўрфазидаги иттифоқчиларига молиявий ёрдам кўрсатади"

Вашингтон Эронга қарши урушда Қўшма Штатларни қўллаб-қувватлаган Форс кўрфази мамлакатларига молиявий ёрдам кўрсатиши мумкин.

АҚШ президенти Дональд Трамп бу ҳақда CNBC телеканалига берган интервьюсида маълум қилди.

Унинг сўзларига кўра, Вашингтон Эрон билан можаро пайтида ўзларини ишончли иттифоқчи сифатида кўрсатган Форс кўрфази мамлакатларига молиявий ёрдам кўрсатиши мумкин. Хусусан, Трамп БАА билан валюта алмаштириш имкониятини истисно қилмади ва бу вариант "кўриб чиқилаётганини" таъкидлади.

"Улар биз учун яхши иттифоқчи бўлишди. Бу ғайриоддий даврлар", деди у.

Шу билан бирга, Трамп минтақадаги юқори даражадаги фаровонликни ҳисобга олган ҳолда, бундай қўллаб-қувватлаш Қўшма Штатлар ичида турли хил реаксияларни келтириб чиқариши мумкинлигини тан олди. Саудия Арабистони ҳақида гапирар экан, у Ар-Риёд ҳозирда "ҳеч нарса сўрамаётганини", аммо Вашингтоннинг муҳим иттифоқчиси бўлиб қолишини таъкидлади.