Тошкентдан Россиянинг қатор шаҳарларига автобус қатнови қайта тикланади

Йўловчилар оқимидан келиб чиққан ҳолда “Тошкент – Омск”, “Тошкент – Пермь”, “Тошкент – Уфа” йўналишида автобус қатновлари қайта тикланади. Бу ҳақда Транспорт вазирлиги ахборот хизмати маълум қилди.

Шунингдек, вазирлик “Тошкент – Краснодар” — янги мунтазам халқаро автобус йўналиши ҳужжатларини тайёрлаб, келишиш учун Россия Транспорт вазирлигига юборган.

Бугундан пойтахт автовокзали орқали “Тошкент–Санкт-Петербург” йўналишида қатновлар бошланган. Автобус ҳафтада 2 марта — чоршанба ва шанба кунлари қатнайди. Чипта нархи — 1 млн 250 минг сўм.

Эслатиб ўтамиз, 18 июлдан Ўзбекистон ва Россия шаҳарлари ўртасида автобус қатнови қайта тикланди. Қатнов коронавирус пандемияси сабаб 2020 йил мартида вақтинча тўхтатиб қўйилган эди. Энди Тошкентдан Москва, Қозон, Петербургга автобусда бориш мумкин.