Тошкентдаги ноқонуний бошланган қурилиш тупроқ ўпирилишига сабаб бўлди

Воқеа «Дилбулоқ» маҳалласи Салар кўчасидаги кўп қаватли уйлар яқинида содир бўлиб, яқин ҳовлига зарар етгани маълум қилинди.

Қурилиш инспекцияси хабарига кўра, ҳудуддаги ишлар «Lyuks Loyiha» МЧЖ томонидан ишлаб чиқилган лойиҳа асосида олиб борилган. Лойиҳа учун «Архитектура ва шаҳарсозлик кенгаши» ва «Шаҳарсозлик ҳужжатлари экспертизаси» ДУКдан ижобий хулоса олинган.

Шу асосда объектнинг А-блоки инспекцияда рўйхатдан ўтган. Инспекция томонидан объект 10 марта текширилиб, 11 та ёзма кўрсатма берилган. Қурилиш қоидалари бузилгани учун буюртмачи икки марта маъмурий жавобгарликка тортилган.

Шу объектнинг G4-блоки бўйича бошқа ҳолат аниқланган. У «Архитектура ва шаҳарсозлик кенгаши»дан ижобий хулоса олган бўлса-да, «Шаҳарсозлик ҳужжатлари экспертизаси»дан хулоса олмаган. Шунинг учун бу блокдаги ишлар инспекцияда рўйхатдан ўтмаган ва ноқонуний бошлангани тасдиқланган. Масала ҳуқуқни муҳофаза қилувчи органларга юборилган.

Олиб борилган текширувлар давомида «Ўзкоммаишийсавдо» МЧЖ томонидан G4-блок учун котлован қазиш жараёнида ҳудуддаги электр трансформаторида носозлик юз бергани маълум бўлди. Натижада сизот сувларини чиқариш мумкин бўлмай, сув сатҳи кўтарилган. Бу эса қўшни «Grand Capital» МЧЖ қурган ерости автотураржойида тупроқ силжиши ва ер сирпанишига олиб келган.

Айни пайтда инспекция томонидан ҳолат юзасидан қўшимча ўрганиш ишлари олиб борилмоқда.