Тошкентда хотинини ўлдириш учун қотил ёллаган эркак ушланди

Тошкент шаҳрида ўзининг шаръий никоҳдаги хотинини ўлдириш учун 10 минг долларга қотил ёллаган эркак қўлга олинди. Бу ҳақда пойтахт Ички ишлар бош бошқармаси хабар берди.

Маълум қилинишича, 1985 йилда Тошкент вилоятида туғилган эркак ўзининг шаръий никоҳида бўлган 1989 йилда туғилган аёлни ўлдириш учун қотил ёллаб, танишига ушбу жиноятни амалга ошириши учун келишилган 10 минг доллардан 2 минг долларини берган.

Шунингдек, буюртмачи ёлланма қотилга аёлнинг яшаш манзили, хонадон рақами, автомобили, кимлар билан яшаши, қачон уйга кириб-чиқиши ҳақида батафсил маълумотларни тақдим этган.

Аёлни ўлдириш учун ёлланган шахс тезкор маълумотлар асосида аввалроқ ички ишлар органлари назоратига олинган ва кейинчалик ҳуқуқ-тартибот идоралари билан ҳамкорлик қилган.

Жиноят-қидирув бўлими ходимлари аёлнинг ҳаётини сақлаб қолиш мақсадида унинг ўлимини саҳналаштириш бўйича махсус тезкор тадбир ўтказган. Жорий йилнинг 20 апрель куни ўтказилган тадбирда ёлланма қотил буюртмачи билан учрашиб, унга турмуш ўртоғи ўлдирилгани ҳақида хабар берган.

Бу хабарни эшитган эркак келишилган пулнинг бир қисми сифатида 6,5 миллион сўм ҳамда жабрланувчи номидаги қора рангли «Tracker» русумли автомобилни топширган вақтида ашёвий далиллар билан қўлга олинган.

Қайд этилишича, ҳозирда мазкур ҳолат юзасидан туман прокуратураси томонидан гумонланувчига нисбатан Жиноят кодексининг 97-моддаси билан жиноят иши қўзғатилган. Унга нисбатан қамоқ эҳтиёт чораси қўлланган, тергов ҳаракатлари давом этмоқда.