"Бизга олдиндан қўнғироқ қил ва сўра"

Германия канцлери Фридрих Мерц Трампга жавоб қайтарди, лекин муомала оҳангини юмшатди.

АҚШ президенти Доналд Трампнинг Германиядан 5 минг нафар америкалик аскарни олиб чиқиш ҳақидаги қарори ва бир неча кунлик очиқ баҳс-мунозаралардан сўнг, канцлер Фридрих Мерц ўз оҳангини анча юмшатди, деб ёзади Der Spiegel.

ARD телеканалига берган интервьюсида Мерц: "Мен трансатлантик алоқалар устида ишлашдан ва Доналд Трамп билан ҳамкорлик қилишдан воз кечмайман", — деб баёнот берди.

Канцлер америкаликларни NATО бўйича "энг муҳим шериклар" деб атади. Шу билан бирга, у Германия ҳукумати ва АҚШнинг айрим масалаларда, масалан, Эрон билан уруш масаласида фикрлари турлича эканини тан олиш муҳимлигини таъкидлади.

Шунингдек, Мерц ҳамкорликдаги муҳим жиҳатларни олдиндан муҳокама қилиш лозимлигига эътибор қаратди.

"Агар биз бундай можарода сенга ёрдам беришимизни истасанг, унда бизга олдиндан қўнғироқ қил ва фикримизни сўра", – деди у.

Канцлер, шунингдек, Жо Байден ваъда қилган "Tomahawk" қанотли ракеталарини жойлаштириш ҳозирча амалга оширилмаслигини тасдиқлади ва буни америкаликларнинг ўзида ҳозирча ракеталар етарли эмаслиги билан изоҳлади. Бироқ у ўрта масофали ракеталарни жойлаштириш масаласи ҳали кун тартибидан тушмаганини қўшимча қилди.

Кейинроқ Мерц Х саҳифасида АҚШ ва Германиянинг умумий мақсади борлигини ёзди: "Эроннинг ядровий қуролга эга бўлишига йўл қўйиб бўлмайди", – дейди у.