Тошкент ва Самарқандда сифатсиз ёқилғини Ai-92 ва Ai-95 деб сотган АЁҚШлар аниқланди

Рақобат қўмитаси ҳудудий бошқармалари ҳамда тегишли ташкилотлар билан ҳамкорликда автомобилларга ёнилғи қуйиш шохобчаларида (АЁҚШ) сотилаётган автобензин сифати бўйича назорат тадбирлари ўтказди.

Тошкент вилоятидаги «BLACK GOLD ENERGY» МЧЖ (Ai-92 ва Ai-95) ва «SAFOMAX OIL» МЧЖ (Ai-92) шохобчаларида сотилаётган юқори октанли автобензинлардан олинган намуналар давлат стандарти талабларига мос келмаслиги аниқланди.

Самарқанд вилояти Жомбой туманидаги «HAPPY OIL» МЧЖга қарашли АЁҚШда сотилаётган AI-95 маркали автобензин сифати талабга жавоб бермаслиги маълум бўлди.

Текширув натижасига кўра, Қўмита ҳудудий бошқармалари томонидан «Истеъмолчиларнинг ҳуқуқларини ҳимоя қилиш тўғрисида»ги қонун бузилиши аломатлари аниқланди. Ушбу ҳолатлар бўйича учта хўжалик юритувчи субъектга нисбатан иш қўзғатилиб, жами 22 миллион сўмга яқин маблағни истеъмолчиларга қайта ҳисоб-китоб қилиш тўғрисида кўрсатма берилган.