Теҳрон Вашингтонга мулоқотни тиклаш учун бешта асосий талабни илгари сурди

Теҳрон Вашингтон томонидан Эрон илгари сурган бешта талаб бажарилган тақдирдагина АҚШ билан музокаралар ўтказади.

Бу ҳақда "Fars" агентлиги манбага таяниб хабар бермоқда. Эрон агентлигининг маълумотига кўра, ушбу талаблар мулоқотга қайтиш учун "минимал ишонч" ҳосил қилиш доирасида белгиланган.

"Теҳрон ушбу шартлар амалда бажарилмасдан туриб, янги музокараларга киришиш имконияти йўқлигига ишончи комил", — дейилади нашрда.

Эрон томонидан қўйилган 5 та асосий шарт:

1. Барча фронтларда, айниқса Ливанда урушни тугатиш;

2. Эронга қарши санкцияларни бекор қилиш;

3. Эроннинг музлатиб қўйилган маблағларини блокдан чиқариш;

4. Ҳарбий ҳаракатлар натижасида етказилган зарарни қоплаш (компенсация тўлаш);

5. Эроннинг Ормуз бўғози устидан суверенитет ҳуқуқини тан олиш.

Бу шартлар АҚШнинг 14 банддан иборат тинчлик таклифига жавобан ишлаб чиқилган. Теҳрон ушбу талабларни музокаралар жараёнини қайта бошлаш учун зарур бўлган минимал кафолатлар деб ҳисобламоқда.