Зеленский диктатор, мунофиқ ва гиёванд(ми)?

Зеленскийнинг собиқ матбуот котиби Такер Карлсонга берган интервюсида собиқ раҳбарини диктатор, мунофиқ ва гиёванд деб атади. Украина бу гапларни рад этди

Украина президенти Зеленскийнинг 2019 йилдан 2021 йилгача матбуот котиби лавозимида ишлаган Юлия Мендел америкалик журналист Такер Карлсонга интервю берди. У интервюсида Зеленский 2022 йилда "Донбассни топширишга" тайёр бўлганини иддао қилди.

"Мен 2022 йилда Истанбулдаги музокараларда Украина томонидан қатнааҳган одамлар билан гаплашганман. Уларнинг айтишича, Зеленский шахсан Донбасс ҳудудларини Москвага беришга рози бўлган. Мен бундан шокда эдим. Энди эса у миллионлаб аудитория олдида туриб: “Мен Донбассни бера олмайман”, демоқда. У ўз сўзида қатъий эмас", — деди Мендел.

Шунингдек, Менделнинг таъкидлашича, 2019 йилда Парижда Путин билан бўлиб ўтган ва ўзи ҳам иштирок этган учрашувда Зеленский Украина ҳеч қачон NATO'га кирмаслигига ваъда берган. Унинг сўзларига кўра, бу ваъда ҳақида деярли ҳеч ким билмайди.

Мендел, шунингдек, Зеленскийни коррупция, гиёванд моддалар истеъмол қилиш ва "урушдан фойда кўриш"да айблади.

Интервю эълон қилинганидан сўнг, Мендел Украинанинг “Миротворец” сайти базасига “россияпараст шахс” сифатида киритилди. Бунга сабаб сифатида "Россия ташвиқотини (пропагандасини) тарқатиш" кўрсатилган.

"Бу хоним ҳеч қандай музокараларда қатнашмаган, қарорлар қабул қилишда иштирок этмаган, эс-ҳуши жойида эмас. Менделнинг гаплари асоссиздир", — дея Менделнинг интервюсига изоҳ берди Украина президенти маслаҳатчиси Литвин.