Таиланд Ўзбекистон фуқаролари учун визасиз кириш тартибини жорий қилмоқчи

Таиланд Туризм ва спорт вазирлиги Колумбия, Мексика ва Ўзбекистондан келувчи сайёҳлар учун 15 кунлик визасиз кириш тартибини жорий этиш таклифини тайёрламоқда. Ушбу ташаббус визаларни расмийлаштиришдаги жиддий кечикишларни бартараф этиш ва узоқ масофадан келувчи сайёҳлар оқимини кўпайтиришга қаратилган. Бу ҳақда расмийлар 27 октябрь, душанба куни маълум қилди.

Мазкур ташаббус халқаро авиакомпаниялар дуч келаётган ташкилий муаммолар кучайиб бораётган бир пайтда илгари сурилмоқда. Яқинда Emirates авиакомпанияси Таиланд Туризм бошқармасига (TAT) расмий шикоят билан мурожаат қилди. Бунга Мексикадан амалга оширилаётган ҳар бир рейсда 20–30 нафаргача йўловчи Таиланд визасини ўз вақтида ололмагани сабабли парвозга келмагани асос бўлган.

Таиланд Туризм ва спорт вазири Сурасак Пханчароенворакул вазирлик Мексика ва Лотин Америкасининг бошқа давлатларида визаларни расмийлаштириш билан боғлиқ сурункали кечикишлардан хабардор эканини тасдиқлади.

«Вазирлик узоқ муддатли ечимни тайёрлади. 9 ноябрь куни бўлиб ўтадиган Виза сиёсати қўмитаси йиғилишига Лотин Америкасидаги истиқболли давлатлар ва бошқа мақсадли мамлакатлар, жумладан, Колумбия, Мексика ҳамда Ўзбекистон фуқаролари учун 15 кунлик визасиз кириш тартибини тасдиқлаш таклифи киритилади», — деди Сурапонг.

Қўмита ушбу ташаббуснинг хавфсизлик ва иқтисодий жиҳатларини атрофлича баҳолаши керак. Шунга қарамай, Туризм вазирлиги хавфсизлик нуқтаи назаридан кам хавфли деб ҳисобланган мамлакатлар учун имтиёзларни имкон қадар кенгайтириш ва уларнинг фуқароларига Таиландда 15 кунгача бўлиш имконини беришни мақсад қилган.

Туризм бошқармаси халқаро маркетинг бўйича Европа, Америка, Яқин Шарқ ва Африка йўналишлари учун масъул ўринбосари Чиравади Кхунсубнинг таъкидлашича, узоқ масофали саёҳатларнинг икки йўналишида мамлакатга кириш билан боғлиқ жиддий тўсиқлар юзага келган.

Лотин Америкаси: визаларни тасдиқлаш ва бериш жараёнидаги мунтазам кечикишлар Мексика ва Колумбиядан келувчи сайёҳларнинг белгиланган саналарда саёҳат қила олмаслигига олиб келмоқда.

Ўзбекистонлик сайёҳлар: илгари Таиландга электрон виза олиш учун мураккаб жараёндан ўтишга мажбур бўлган. Аризалар фақат Россиядаги Таиланд Қироллиги элчихонаси орқали кўриб чиқилган. Бу эса ортиқча қийинчиликларни келтириб чиқарган. Натижада маҳаллий туроператорлар Таиландга мўлжалланган саёҳат пакетларини бекор қилиб, Вьетнам каби рақобатчи йўналишларни таклиф қила бошлаган.

Таклиф этилаётган янги сиёсат визалар билан боғлиқ тўсиқларни бартараф этиш, сайёҳларнинг мамлакатга кириш жараёнини соддалаштириш ҳамда халқаро туроператорлар ва авиакомпанияларнинг Таиландга бўлган ишончини тиклашга қаратилган.