Россия Адлия вазирлиги «чет эл агентлари» реестрига тадбиркор Олег Тинковни киритди.
Қарорда Тинков чет эл агентлари материалларини яратишда иштирок этгани, Россия расмийларининг қарорлари ва сиёсати тўғрисида «нотўғри маълумот» тарқатгани, шунингдек, Россиянинг Украинадаги «махсус ҳарбий операциясига» қарши чиққани таъкидланган.
Олег Тинков Россия қўшинларининг Украинага кенг кўламли бостириб кириши бошланганидан кейин урушга қарши позицияни эгаллади. Тадбиркор 2022 йил октябр ойида «Путин фашизми билан алоқадор бўлишни истамаслигини» айтиб, Россия фуқаролигидан воз кечган эди.
Россияда Тинков TCS Group («Тинкофф» банкнинг бош компанияси) улушига эга эди, аммо 2022 йил апрел ойида у активни Владимир Потаниннинг «Интеррос» ҳолдингига сотди. Тинковнинг таъкидлашича, Россия ҳукумати уни ўз улушини «арзон-гаровга» сотишга мажбурлаган. Сотишдан кейин Тинковнинг бойлиги бир неча миллиард доллардан 860 миллион долларгача тушиб кетди, деб ёзди Forbes.
Тинковнинг урушга қарши позициясига қарамай, 2022 йил март ойида Буюк Британия унга қарши санкциялар киритди. 2023 йил июл ойида Британия ҳукумати бу қарорни бекор қилди.
