Сурия президенти яратиш ва ўзгартириш ҳукумати тузилганини эълон қилди

Сурия муваққат президенти Аҳмад аш-Шара Сурия халқини янги вазирлар маҳкамаси тузилгани билан табриклаб, уни яратиш ва ўзгариш ҳукумати деб атади.

Бу ҳақда у "Қаср аш-Шаб" саройида бўлиб ўтган тантанали тадбирда сўзлаган нутқида маълум қилган. Сурия президентининг нутқи Al Hadath телеканали томонидан намойиш этилмоқда.

"Мамлакатимиз яхши келажак сари йўлда янги тарихий даврга қадам қўймоқда", — деди ал-Шара. "Биз қайта қуриш ва ислоҳотларни амалга оширадиган яратиш ва ўзгартириш ҳукумати тузилганини эълон қиламиз."

"Мен Сурия халқини миллат ва ҳар бир фуқаро манфаатларини кафолатлайдиган кучли ва барқарор давлат қуриш бошланишига ишонтириб айтаман", - дея таъкидлади ал-Шара. "Мен ҳаммани қўл қовуштириб, биз муносиб Сурия учун ҳаракат қилишга чақираман" - деди. Президент барча давлат иши шаффоф бўлишини таъкидлади. "Биз коррупциянинг давлат институтларига кириб келишига йўл қўймаймиз".

Ўтиш даври ҳукуматининг Ташқи ишлар вазирлиги раҳбарлари Асад Ҳасан ал-Шибоний ва Мудофаа вазирлиги раҳбари Мурҳаф Абу Қаср янги вазирлар маҳкамасидаги ўз лавозимларини сақлаб қолди. Маросимда ҳар икки вазир нутқ сўзлади. Бош разведка хизмати раҳбари лавозимини эгаллаб келган Анас Ҳасан Хаттоб ички ишлар вазири этиб тайинланди.

Аввалроқ Al Hadath Суриянинг янги ўтиш даври ҳукумати 22 вазирдан иборат бўлиши ҳақида хабар берган эди. Ҳукумат ишига ал-Шаранинг ўзи раҳбарлик қилади, 13 март куни қабул қилинган конституциявий декларацияга кўра, унинг қўлида барча ижро ҳокимияти жамланган. Телеканал манбаларининг қайд этишича, ҳукумат инклюзив бўлиб, асосан технократ вазирларни ўз ичига олади. Янги вазирлар маҳкамаси 10 декабрдан бошлаб Муҳаммад ал-Башир бошчилигидаги ўтиш даври ҳукуматини алмаштиради. Суриядаги ўтиш даври беш йил давом этади, шундан сўнг умумхалқ сайловлари ўтказилади.