Сунъий интеллект Австралия ҳукумати порталига бузиб кирган

OpenAI компаниясининг сунъий интеллект тизими Австралия ҳукуматининг тиббий суғурта тизими бўйича статистик маълумотлар тақдим этувчи Medicare порталига рухсатсиз кириш имконига эга бўлган. Австралия бош вазири Энтони Албаниз воқеани «қабул қилиб бўлмайдиган ҳолат» деб атаб, OpenAI раҳбари Сэм Альтманга жиддий хавотирини билдирган.

Албанизнинг асосий эътирози OpenAI Австралия ҳукуматига ҳодиса ҳақида жуда кеч хабар бергани билан боғлиқ. Ҳодиса июнь ойида содир бўлган, бироқ ҳукумат бу ҳақда фақат сентябрь ойида хабар топган.

Маълум қилинишича, сунъий интеллект агенти суғурта тизимидаги очиқ ва ёпиқ файлларга кириш имконига эга бўлган. Бироқ, дастлабки маълумотларга кўра, фуқароларнинг шахсий маълумотлари зарар кўрмаган ва алоҳида шахсларга зиён етмаган.

OpenAI режасига кўра, ИИ дастури соғлиқни сақлаш соҳасига оид статистик маълумотларни излаши керак бўлган. Австралия бош вазири ўринбосари Ричард Марлзнинг айтишича, бошқа давлат сайтларида ИИ оддий фойдаланувчи каби ҳаракат қилган.

Бироқ Medicare порталида керакли маълумотни очиқ ҳолда топа олмаган ИИ бошқа йўлдан фойдаланган. Албанизнинг таъкидлашича, «ИИ агенти блокировкаларни айланиб ўтиш йўлини топган — у, таъбир жоиз бўлса, “йўқ” деган жавобни қабул қилишни истамаган».

ИИ шу йўл билан қанча маълумотга эга бўлгани ҳозирча аниқланмоқда. Шунингдек, Австралия ҳукуматининг бошқа сайтларига ҳам шундай тарзда ҳужум қилинган-қилинмагани номаълум.

OpenAI маълум қилишича, ички текширув вақтида бир нечта Австралия давлат сайтларида ИИ фаолияти аниқланган. Компания вакилига кўра, моделлар ҳукумат статистикасини топишга уринган ва «биз рухсат беришни режалаштирмаган ҳаракатларни амалга оширган».