Швейцария Украинага 3 миллион доллар ажратади

Швейцария ҳукумати Халқаро Қизил Хоч Қўмитаси (ХҚХҚ) Марказий агентлигининг Украинадаги вазият бўйича 2025 йилдан 2026 йилгача бўлган даврдаги фаолиятини қўллаб-қувватлаш учун 2,4 миллион Швейцария франки (тахминан 3 миллион доллар) ажратишга ваъда берди.

Бу ҳақда ҳукуматнинг баёнотида айтилмоқда.

“Бугун Швейцария ХҚХҚ Марказий агентлигининг Женевадаги бюросини қўллаб-қувватлаш учун 2,4 миллион Швейцария франки (2025-2026) ажратишга ваъда берди”, — дейилади хабарда.

Департамент Швейцария Женева конвенцияларининг иштирокчиси сифатида бедарак йўқолганларни қидиришга катта аҳамият беришини таъкидлади.

ХҚХҚ аввалроқ Россия-Украина можароси муносабати билан ташкилотга бедарак йўқолганлар бўйича келиб тушган мурожаатлар сони август ойида 154 мингдан ошгани ҳақида хабар берган эди. Ташкилот маълумотларига кўра, уруш бошланганидан буён фронтнинг ҳар икки томонидаги 15 мингга яқин оиланинг тақдири ва қаердалиги ҳақида маълумот беришга муваффақ бўлган.