Ширин лимонадларни мунтазам истеъмол қилиш соч тўкилиши хавфини кескин оширади — янги тадқиқот

Ширин лимонад ва газли ичимликларни мунтазам истеъмол қилиш соч тўкилиши хавфини кескин оширади.

2023 йилда Хитой олимлари аниқлаганидек, ҳар куни камида битта порция ширин газли ичимликлар ичадиган ёш эркакларда соч тўкилиши хавфи, бу одатдан воз кечганларга нисбатан уч баробар юқори.

Энди эса португалиялик олимлар ҳам ушбу хулосани тасдиқлашди: ширин ичимликлар сочнинг қалинлиги, ўсиши ва товланишига салбий таъсир кўрсатиши мумкин. Ҳар ҳафта 3,5 литрдан кўп (яъни кунлик ўртача 500 мл) ичимлик истеъмол қиладиган эркаклар бошқаларга нисбатан кўпроқ соч тўкилишига дуч келиши аниқланган.

Мутахассислар фикрича, бунга ортиқча шакар сабаб бўлади — у қон айланишига салбий таъсир кўрсатади ва яллиғланиш жараёнларини кучайтиради, натижада соч фолликулалари заифлашади. Энергетик ичимликлар ҳам хавфли: улардаги юқори миқдордаги кофеин стресс гормони — кортизолни кўтариши мумкин.

Ҳозирча олимлар ширин ичимликлар соч тўкилишига қандай механизм орқали таъсир кўрсатишини чуқур ўрганмоқда, аммо ўзаро боғлиқлик аллақачон исботланган.

Маълумотларга кўра, 20 ёшга етган эркакларнинг камида 25 фоизида соч тўкилиши белгиларини кўриш мумкин. 50 ёшдан ошганлар орасида эса бу кўрсаткич 85 фоизга етади.

Олимлар газли ичимликларни камайтириш билан бирга бошқа чораларни ҳам таклиф қилишмоқда. Жумладан, витамин D истеъмоли каллик хавфини пасайтиради.