Шимолий Корея аскарларининг аксарияти Украинада ҳалок бўлиши тахмин қилинди

Тажрибасиз, яхши ўқитилмаган ва етарлича озиқланмаган КХДР қўшинлари Украинага қарши урушда иштирок этиш учун Россияга йўл олди, деб ёзади The Guardian.

НАТО ва Пентагон 10 000 га яқин Шимолий Корея қўшинлари аллақачон Россияда, хусусан Украина чегарасидаги Курск яқинида эканлигини, улар бир неча кун ичида ҳаракатга киришишлари мумкинлигини тасдиқлади. АҚШ Давлат котиби Энтони Блинкен таъкидлашича, «Россия уларни артиллерия, дрон операциялари ва пиёда қўшинлар операцияларига ўргатган», уларни фронтдаги жангларга тайёрлаган.

Гарчи уларнинг иштироки Россияга сафарбарликдан қочишга ёрдам берсада, экспертлар тажрибаси йўқлиги сабабли ушбу бўлинмаларнинг самарадорлигига шубҳа қилишади. Аксарияти 20 ёшгача бўлган ёшлар бўлган аскарлар текисликларда жанг қилишга одатланмаган.

Шимолий Корея аскарлари авваллари 1950 йилларда фақат Корея урушида хизмат қилган, сўнгги йилларда эса бошқа давлатларга маслаҳатчи сифатида ҳарбий ёрдам кўрсатган. Энди улар рус қуроллари, хусусан, пулемётлар, миномётлар ва снайпер милтиқлари билан жиҳозланди.

Таҳлилчиларнинг таъкидлашича, Шимолий Корея учун бу тарихий қарор, чунки илгари у катта қуруқлик қўшинларини чет элга юбормаган. Бироқ, Шимолий Кореянинг собиқ зобити Ан Чан Ил таъкидлашича: «Ким Чен Ин таваккал қилмоқда. Агар катта миқдордаги йўқотишлар бўлмаса, у маълум даражада хоҳлаган нарсасини олади. Лекин унинг кўп аскарлари жангда ҳалок бўлса, ҳаммаси бошқача бўлади.»

Кўпгина Шимолий Кореяликлар учун Россияда жанг қилиш мағрурлик ва оилаларини боқиш учун пул топиш имкониятидир.

Собиқ офицер, ҳозирда Сеулдаги фаоллар гуруҳига раҳбарлик қилаётган Чой Чон Хун ўз ватандошларини соғинади, уларни замбарак гўшти деб билади: «Улар энг хавфли позицияларга юборилади. Ишончим комилки, уларнинг кўпчилиги ҳалок бўлади.»