Шавкат Мирзиёв: "Бугун тадбиркорларимиз “бизнесни бошлаш” босқичидан “капитални кўпайтириш” босқичига ўтяпти"

Беш йилда корхоналарнинг асосий капиталга инвестицияси 3 карра кўпайиб, 363 триллион сўмга етди. Саноати 100 миллион доллардан ошган туманлар сони 66 тадан 116 тага кўпайди.

Ахборот технологиялари, финтех ва бошқа сервис соҳаларининг жадал ривожланаётгани ҳисобига хизматлар ҳажми 1 триллион сўмлик маррадан ўтган туманлар сони 41 тадан 152 тага етди. Етакчи халқаро маркетплейслар билан ишлаётган корхоналар эса 3,5 мингтани ташкил этмоқда.

"– Бугун тадбиркорларимиз “бизнесни бошлаш” босқичидан “капитални кўпайтириш” босқичига ўтяпти, – деди давлатимиз раҳбари.

Бизнесини маҳаллада бошлаб, юртимиз бўйлаб ўнлаб филиалларга эга бўлган тадбиркорлар 550 тадан, миллий брендини яратганлар 300 тадан ошди.

Сўнгги йилларда мис, олтин, металл прокат, полиетилен, ПВХ, каолин ва бошқа хомашёларнинг таклифи оширилди. Натижада электротехника, қурилиш материаллари, фармацевтика, тўқимачилик ва мебелсозлик каби соҳаларда “катта сакраш” қилинди.

Электромобил, полимер ва маиший кимё, “яшил” энергетика, заргарлик саноати каби янги йўналишлар шаклланди. ““BYD”, “ADM Jizzakh”, “Sirdaryo Asaka Motors” каби замонавий автомобиль заводлари соҳага янги компетенсия ва технологиялар олиб кирди.