Хитой АҚШга жавоб чоралари билан таҳдид қилди

Хитой Россия нефтини харид қилгани учун АҚШ санкцияларига жавоб чоралари билан таҳдид қилди.

Хитой Россия энергетика ресурсларини харид қилаётган давлатларга қарши АҚШ томонидан жорий этилаётган санкцияларга қарши эканини билдирди.

Хитой Савдо вазирлиги вакили Пекин БМТ Хавфсизлик кенгаши тасдиғисиз ва халқаро ҳуқуқий асосларсиз жорий этилган бир томонлама санкцияларни қўллаб-қувватламаслигини маълум қилди.

Гап Россия нефти ва газини харид қилаётган давлатларга нисбатан иккиламчи санкциялар қўллаш имконини берувчи АҚШ қонуни ҳақида кетмоқда. Унга кўра, Вашингтон Россия энергетика ресурсларини сотиб олувчи давлатлар товарларига 100 фоизгача бож жорий қилиши мумкин.

Хитой Россия нефтининг йирик харидорларидан бири ҳисобланади. Пекин Вашингтоннинг кейинги ҳаракатларини диққат билан кузатаётганини ва зарурат туғилса, мамлакат суверенитети, миллий манфаатлари ҳамда Хитой компанияларининг қонуний ҳуқуқларини ҳимоя қилиш учун «барча зарур чораларни» кўришини билдирди.

Хитой, шунингдек, барча давлатлар билан тенглик ва ўзаро манфаат асосида савдо-иқтисодий ҳамкорликни давом эттиришини таъкидлади.