Шаффофлик ва соғлом рақобат: давлат мулки очиқ аукционда рекорд нархга сотилди

Тошкент шаҳридаги давлат объекти 157,8 млрд сўмлик бошланғич нарх ўрнига 213 млрд сўмга сотилди. Бу очиқ электрон савдоларда рақобат ва давлат активларини бозор тамойиллари асосида реализация қилиш имкониятларини кўрсатувчи натижалардан биридир.

2026 йил 26 октябрь куни E-auksion электрон савдо платформасида Тошкент шаҳрининг Юнусобод туманида жойлашган «Республика аэрогеодезия маркази» биносини сотиш бўйича очиқ аукцион ўтказилди. «Буюк Турон» МФЙ ҳудудида жойлашган объектнинг бошланғич сотув қиймати 157,8 млрд сўм этиб белгиланган эди. Савдоларда икки нафар талабгор иштирок этиб, давлат мулкини сотиб олиш учун ўз нарх таклифларини билдирди.

Аукцион якунларига кўра, «UTKIR SHOP» МЧЖ 213 млрд сўмлик таклиф билан ғолиб деб топилди.

Натижаларни таҳлил қиладиган бўлсак, объектнинг якуний сотув нархи бошланғич қийматдан 55,2 млрд сўмга, яъни қарийб 35 фоизга юқори бўлди. Бошқача айтганда, давлат активининг сотув қиймати белгиланган дастлабки нархга нисбатан сезиларли даражада ошди.

Бу каби савдоларнинг аҳамияти шундаки, давлат мулкини очиқ электрон аукцион орқали сотиш жараёнида талабгорлар ўз таклифларини билдиради ва якуний нарх савдо натижалари асосида шаклланади. Бу эса давлат активларини бозор тамойиллари асосида реализация қилиш, харидорлар ўртасидаги рақобатни рағбатлантириш ҳамда активларнинг иқтисодий қийматини рўёбга чиқариш учун имконият яратади.

Мазкур объект Ўзбекистон Республикаси Президентининг 2026 йил 28 августдаги ПФ-177-сон Фармонида белгиланган давлат активларини хусусийлаштиришнинг янги механизмлари доирасида савдога чиқарилган.

Якуний натижа аниқ: 157,8 млрд сўмлик бошланғич нархга эга давлат объекти 213 млрд сўмга сотилди. Очиқ савдоларда шаклланган 55,2 млрд сўмлик қўшимча қиймат давлат активларини хусусийлаштиришда шаффофлик ва рақобатнинг иқтисодий аҳамиятини намоён этади.