Сербия парламенти учун навбатдан ташқари сайловлар 18 ёки 25 октябрда ўтказилади

Сербия президенти Александр Вучич мамлакатда навбатдан ташқари парламент сайловлари жорий йилнинг октябр ойида ўтказилишини маълум қилди. У бу ҳақда 20 август куни RTS телеканали эфирида гапирди. Вучичнинг сўзларига кўра, овоз бериш 18 ёки 25 октябр куни бўлиб ўтади. Сайловларнинг аниқ санаси эса яқин кунларда маълум қилиниши кутилмоқда. Шу тариқа, парламент сайловлари дастлаб белгиланган муддатдан бир йилдан кўпроқ олдин ўтказилади. Июн ойи охирида Вучич яқин келажакда президентлик лавозимини муддатидан олдин тарк этиш режаси борлигини ҳам айтган эди. У Сербияда 12 йилдан бери ҳокимият тепасида бўлиб, президентлик ваколатининг иккинчи муддати 2027 йил ўрталаридагина якунланади. Сербия Конституциясига мувофиқ, бир шахс мамлакат президенти лавозимини икки муддатдан ортиқ эгаллаши мумкин эмас. Сербияда бир ярим йилдан ортиқ вақтдан бери ҳукумат ва коррупцияга қарши оммавий намойишлар давом этмоқда. Норозилик акцияларига Нови-Сад шаҳридаги темирйўл вокзали айвонининг қулаб тушиши сабаб бўлган. Фожиа оқибатида 16 киши ҳалок бўлган. Reuters маълумотига кўра, талабалар бошчилигидаги намойишларга мунтазам равишда ўн минглаб, айрим ҳолларда эса юз минглаб одамлар чиқмоқда. Намойишчиларнинг асосий талабларидан бири айнан муддатидан олдин парламент сайловларини ўтказиш эди. Жамоатчилик фикри сўровларида келтирилган маълумотларга кўра, Сербия аҳолисининг қарийб 80 фоизи талабаларнинг коррупцияга қарши талабларини қўллаб-қувватлайди. Сўралганларнинг тахминан 64 фоизи эса намойишларнинг ўзини қўллаб-қувватлашини билдирган.