Саудия Арабистони Трампга тезкор жавоб қайтарди

Саудия Арабистони Трампга тезкор жавоб бериб, Фаластин давлати ташкил этилмагунча Исроил билан ҳеч қандай муносабат ўрнатмаслигини маълум қилди.

Саудия Арабистони АҚШ Ғазо секторини назоратга олишни истаётганини айтган президент Доналд Трампнинг Ар-Риёд Фаластин ватанини талаб қилмаяпти, деган баёнотига қарши чиқиб, Фаластин давлати ташкил этилмагунча Исроил билан муносабат ўрнатмаслигини билдирди.

Сешанба куни Трамп кутилмаган баёнот бериб, фаластинликлар бошқа ҳудудларга кўчирилганидан сўнг, Қўшма Штатлар урушдан хароб бўлган ҳудудни ўз назоратига олиб, уни иқтисодий жиҳатдан ривожлантиришини айтди. У ташриф буюрган Исроил бош вазири Бинямин Нетаняҳу билан биргаликдаги матбуот анжуманида сўзга чиқди.

Саудия Арабистони чоршанба кунги баёнотида фаластинликларни ўз ерларидан кўчириш борасидаги ҳар қандай уринишларни рад этишини ҳамда фаластинликларга нисбатан муносабати музокара предмети бўла олмаслигини маълум қилди.

Баёнотда таъкидланишича, Саудия Арабистони валиаҳд шаҳзодаси Муҳаммад бин Салмон подшоҳликнинг бу борадаги позициясини ҳеч қандай вазиятда бошқача талқин қилиниши мумкин бўлмаган "аниқ ва қатъий" тарзда тасдиқлади.