Озарбайжон Эронга жавоб чораларини кўрди

Эрон AzTV телеканалини "душман ОАВ" рўйхатига киритганидан сўнг, Озарбайжон Sahar TV телеканали ва Mehr ахборот агентлиги фаолиятини ноқонуний деб эълон қилди.

Эрон Разведка вазирлиги давлатга қарашли AzTV телеканалини "душман ОАВ" рўйхатига киритганидан сўнг, Озарбайжон ўз ҳудудида Эроннинг Sahar TV телеканали ҳамда Mehr ахборот агентлиги фаолиятини ноқонуний деб топди.

Озарбайжоннинг Медиа ривожлантириш агентлиги (MEDİA) баёнотига кўра, Теҳроннинг ушбу қарори, шунингдек, бундай ОАВ билан ҳамкорлик қилган шахсларга нисбатан жиноий жавобгарлик қўллаш таҳдиди журналистика соҳасидаги халқаро ҳамкорлик тамойилларига зид бўлиб, тушунарсиз ҳисобланади.

Агентлик эслатишича, Озарбайжон қонунчилигига мувофиқ, агар хорижий давлат Озарбайжон ОАВ вакилларига нисбатан шундай чекловлар жорий этса, мамлакат ҳам хорижий журналистларга нисбатан ўзаро (кўзгу) тамойили асосида чекловлар қўллаши мумкин.

Шу муносабат билан Боку Sahar TV, Mehr ахборот агентлиги ва уларнинг вакилларининг Озарбайжон ҳудудидаги фаолиятини ноқонуний деб эълон қилди. Уларга мамлакат суверенитети, ҳудудий яхлитлиги, конституциявий тузуми ва миллий хавфсизлигига қарши тарғибот олиб бораётганлик айби қўйилди.

Бундан ташқари, Медиа ривожлантириш агентлиги Озарбайжоннинг барча ОАВлари ва журналистларини мазкур Эрон оммавий ахборот воситалари билан ҳамкорликни тўхтатишга чақирди. Агентлик таъкидлашича, халқаро медиа ҳамкорлиги фақат ўзаро ҳурмат ва журналистларнинг касбий мустақиллиги тамойиллари асосида олиб борилиши лозим.