Рубль курси билан боғлиқ вазият «умуман» назорат остида

Рубль курси билан боғлиқ вазият «умуман» назорат остида, деди Владимир Путин Қозоғистонга ташрифи якунлари бўйича Остонадаги матбуот анжуманида.

«Ва, албатта, ваҳима қилиш учун ҳеч қандай сабаб йўқ. Ҳа, мамлакатимиз ва қўшни давлатлардаги жараёнлар осон кечмаяпти, лекин улар назорат остида, ҳаммаси режа бўйича кетмоқда», — деди Путин.

Путиннинг сўзларига кўра, рубль курсининг ўзгариши кўплаб омиллар, жумладан, буджетга тўловлар ва нефть нархи билан боғлиқ. Унинг қўшимча қилишича, асосий ставкани оширмасдан инфляцияга қарши курашиш воситалари мавжуд, аммо якуний қарорлар Марказий банкда қолади.

25 ноябрда рубль тез туша бошлади: 27 ноябрь, чоршанба куни биржадан ташқари Форех валюта бозорида унинг долларга нисбатан курси 115 рублга яқинлашди, евро 120 рубль даражасидан ошиб кетди. 28 ноябрь куни Марказий банк валюта курсини 108 рубль қилиб белгилади. Рубль курси охирги марта 2022 йилнинг март ойида бундай даражада бўлган эди.