АҚШ президенти бу ҳақда Аir Force One самолёти бортида матбуот вакиллари билан мулоқот чоғида айтиб ўтди.
Журналистлардан бири Трампга савол берар экан, у Украинанинг Путин қароргоҳига зарба бергани ҳақидаги хабарлардан “жуда ғазаблангани”ни эслади. "Мен бу зарба берилганига ишонмайман", — дея жавоб қайтарди Трамп.
Оқ уй раҳбари нима учун ҳужумдан сўнг дарҳол шундай руҳда фикр билдиргани ҳақидаги саволга Трамп шундай жавоб берди: "Чунки ўша пайтда ҳеч ким ҳеч нарсани билмасди. Бу ҳақда мен биринчи марта эшитган нарса шу эди. Путин уйимга ҳужум қилинди, деди. Биз маълумотни текширганимизда бунга ишонмадик, лекин ўшанда бу ҳақда умуман биринчи бор эшитганимиз шу эди".
Шунингдек, Трамп Украинадаги урушни тўхтатиш учун охирги муҳлат йўқлигини, бироқ у можаро тезроқ якунланишига умид қилишини айтди.
Россиянинг Украина Путинни Валдайдаги резиденциясига ҳужум қилишга урингани ҳақидаги баёнотлари Украина президенти Володимир Зеленский АҚШга ташриф билан келган ва у ерда президент Доналд Трамп билан Украина бўйича тинчлик режасини муҳокама қилаётган пайтда янграган.
"Улар қандайдир резиденция ҳужумга учради деб баёнот қилиб, шунчаки Украина пойтахтига ва давлат биноларига зарба бериш учун замин тайёрлаяпти. Москва тинчлик музокараларидаги илгарилашга халал бермоқчи", — дея таъкидлаганди Зеленский.
1 январ куни Россия Мудофаа вазирлиги идора ихтиёрида Владимир Путиннинг Валдайдаги резиденциясига “ҳужумда қатнашган украин дронлари”дан бирининг контроллери борлигини ва уни АҚШга топширганини билдирганди. Аммо Вашингтон бунга муносабат билдирмаган.
