Россияда йирик АЁҚШ тармоғи банкрот деб топилиши мумкин

Россиянинг «Россия» банки автозаправка шохобчалари тармоғи оператори «ЕвроТранс»ни банкрот деб топиш тўғрисида арбитраж судига мурожаат қилиш ниятида. Бу ҳақда тегишли хабар «Федресурс» реестрида эълон қилинган. Ҳужжатда банк кредитор, «ЕвроТранс» эса қарздор сифатида кўрсатилган.

23 июль ҳолатига кўра, компания умумий қиймати 169 миллион рубль бўлган тўртта облигация чиқарилиши бўйича купон тўловларини амалга оширмаган. Ҳозирда «ЕвроТранс»нинг еттита облигация чиқарилиши муомалада бўлиб, молиявий мажбуриятларни бажаришдаги муаммолар апрель ойи охирида бошланган. Ўшанда компания 600 миллион рубллик рақамли молиявий активлар бўйича тўловни икки кун кечиктирган эди.

Бир неча техник дефолтлардан кейин «Эксперт РА», НКР ва НРА рейтинг агентликлари компаниянинг кредит рейтингини пасайтириб, кейинчалик уни бутунлай бекор қилди. Ҳозирги вақтда эмитентнинг амал қилувчи кредит рейтинги мавжуд эмас.

Банкнинг банкротлик ҳақидаги режаси маълум бўлганидан сўнг Москва биржасида «ЕвроТранс» акциялари 15,5 фоизга арзонлаб, бир донаси 37 рублга тушди. 2026 йил бошидан буён компания акциялари қиймати 70 фоиздан ортиқ пасайган.

Компания облигациялари ҳам кескин қадрсизланди. Чиқарилиш турига қараб уларнинг нархи 13,45 фоиздан 29,85 фоизгача тушган. Энг катта пасайиш 2027 йил март ойида қопланиши режалаштирилган БО-001Р-07 облигацияларида қайд этилди.

Бозор иштирокчилари таъкидлашича, Россияда ёқилғи чакана савдосидаги вазият ҳам ёмонлашмоқда. Уларнинг ҳисоб-китобларига кўра, июль ойида бензин савдоси мустақил АЁҚШ тармоқлари ва йирик нефть компаниялари учун ҳам зарар келтира бошлаган. Айниқса, АИ-92 бензини бўйича эксплуатация харажатлари ҳисобга олинганда маржинал даромад манфий кўрсаткичга тушган.

Bloomberg маълумотларига кўра, сўнгги уч ой ичида Украина ҳарбийлари Россия нефтьни қайта ишлаш заводларига қарийб 50 марта ҳужум уюштирган ва йирик 34 та заводнинг камида 24 тасига зарар етказган. Шу шароитда июнь ойида Россияда нефтьни қайта ишлаш ҳажми сўнгги 21 йилдаги энг паст даражага тушган. Натижада бензин ва дизель ёқилғиси тақчил маҳсулотга айланган, нархлар эса ўсишда давом этмоқда.