Россияда ҳарбий комиссариатлар ҳарбий хизматга мажбур шахсларнинг молиявий ва тиббий маълумотларига эга бўлади

Россия Мудофаа вазирлиги фуқароларнинг даромадлари, банк ҳисоблари, қарзлари ва касалликлари, шунингдек уларнинг яқин қариндошлари ҳақидаги маълумотларни сўрашга рухсат беришни таклиф қилмоқда.

Россиядаги ҳарбий комиссариатлар ҳарбий хизматга мажбур фуқаролар ва уларнинг оила аъзолари ҳақида кенгайтирилган ҳажмда шахсий маълумот олиши мумкин. Тегишли буйруқ лойиҳасини Россия Мудофаа вазирлиги тайёрлаган.

Ҳужжат давлат органлари ва хусусий ташкилотлардан маълумот сўраш имкониятини назарда тутади. Бундай маълумотлар ҳарбий хизматга яроқлиликни, шунингдек муайян лавозимларга контракт асосида хизматга кирмоқчи бўлган фуқароларнинг яроқлилигини аниқлаш учун зарур деб кўрсатилган.

Лойиҳага кўра, ҳарбий комиссариатлар фуқароларнинг даромадлари, жумладан солиқ декларациялари, банк ҳисоб рақамлари ва омонатлари, кредитлари ва қарзлари, қарздорликлари, молиявий мажбуриятларни бузиш ҳолатлари ҳамда банкротлик ҳақидаги маълумотларни олиши мумкин.

Шунингдек, меҳнат ва тадбиркорлик фаолияти, сиёсий ва жамоат бирлашмаларида иштирок этиш, йўл-транспорт ҳодисалари, никоҳ тузиш ва бекор қилиш, хорижга чиқиш паспорти мавжудлиги ҳақидаги маълумотлар ҳам рўйхатга киритилган.

Тиббий муассасалар эса психик касалликлар, гиёҳвандлик ва алкоголга қарамлик, сил, ОИВ ҳамда вирусли гепатитлар каби касалликлар ва ҳолатлар ҳақида маълумот бериши керак бўлади.

Бундан ташқари, ҳарбий комиссариатлар маъмурий ва жиноий ишлар ҳақида ҳам маълумот сўраши мумкин. Бунга иш қўзғатилишидан тортиб, шахснинг қидирувга берилиши, суд ҳукми чиқарилиши ва судланганлик ҳолатигача бўлган маълумотлар киради.

Лойиҳага кўра, айрим маълумотлар нафақат ҳарбий хизматга мажбур шахснинг ўзи, балки унинг яқинлари — турмуш ўртоғи, фарзандлари, ота-онаси, туғишган ака-ука ва опа-сингиллари, шунингдек турмуш ўртоғининг айрим қариндошлари ҳақида ҳам олиниши мумкин.

Июль ойининг охирида Россияда мулкчилик шаклидан қатъи назар ташкилотларни ҳарбий идораларнинг сўровига кўра зарур маълумотларни бепул тақдим этишга мажбур қилувчи федерал қонун қабул қилинган эди. 25 августда тайёрланган Мудофаа вазирлиги буйруғи лойиҳаси эса ҳарбий комиссариатлар сўраши мумкин бўлган маълумотлар рўйхатини аниқлаштиради.