Россия ва Украина Донбассда ҳеч бир армия назорат қилмайдиган қуролсизлантирилган ҳудуд ташкил қилишни муҳокама қилди

Бу ҳақда The New York Times хабар бериоқда.

Нашр хабарига кўра, бу ғоя АҚШ президенти Доналд Трампнинг тинчлик режасида илгари сурилган таклифни яна кун тартибига олиб чиқади. Қўшма Штатларнинг дастлабки режасида демилитаризация зонаси (қуролсиз ҳудуд) Россияга тегишли ҳудуд сифатида тан олиниши керак эди.

The New York Times манбалари томонлар демилитаризация зонасида урушдан кейин ҳудудни бошқарадиган фуқаролик маъмуриятини ташкил этиш ғоясини муҳокама қилганини маълум қилди.

Манбалардан бирининг айтишича, ушбу маъмурият таркибига Россия ва Украина вакиллари биргаликда кириши мумкин. Бироқ ҳозирча ҳеч қандай якуний келишувга эришилмаган.

4–5 феврал кунлари Абу-Дабида бўлиб ўтган музокараларда Украина вакиллари Россия Қуролли кучларини фронт чизиғидан қисман олиб чиқиш вариантларини муҳокама қилган. Нашр манбаси қўшинларни олиб чиқиш жараёни симметрик бўлмаслиги мумкинлигини, яъни томонлар бир хил ҳажмда чекинмаслиги эҳтимоли борлигини билдирди.