"Реал" ярим ҳимоячиси инглиз клуби акцияларини сотиб олмоқда

"Реал" ярим ҳимоячиси Лука Модрич Англиянинг "Суонси" клуби хўжайинларидан бирига айланади. Бу ҳақда нуфузли инсайдер Фабрицио Романо хабар берди.

Манбага кўра, келишув аллақачон бўлиб ўтган, футболчи эса акцияларнинг кичик фоизига эгалик қилади. Бу Модричнинг фаолиятига таъсир қилмаслиги айтилди.

Модрич 2008 йилдан 2012 йилгача "Тоттенхэм" сафида Англия Премьер-лигасида тўп тепган. Айнан "шпорлар" лагеридан ярим ҳимоячи испан грандига ўтган ва у шу кунгача ўйнамоқда. 39 ёшли хорватияликнинг “Лос-Бланкос” билан амалдаги меҳнат шартномаси 2025 йилнинг июн ойи охиригача амал қилади.