Франция терма жамоасини жаҳон чемпионлиги сари етаклаган Дидье Дешам фаолиятини Мадриднинг «Реал» клубида давом эттириши мумкин. Испания гранди раҳбарияти бош мураббийлик лавозими учун франциялик мутахассис номзодини муҳокама қилмоқда.
Radio Marca журналисти Серхио Валентин тарқатган маълумотларга кўра, клуб президенти Флорентино Перес Жозе Моуриньонинг ишидан тўлиқ қониқмаяпти. Агар яқин орада жамоанинг ўйини ва натижаларида ижобий ўзгариш кузатилмаса, португалиялик мутахассис билан ҳамкорликни тўхтатиш масаласи кун тартибига чиқиши мумкин.
Мадридликларнинг Ла Лигадаги ҳозирги ҳолати ҳам мураббий атрофидаги муҳокамаларга сабаб бўлмоқда. Саккизта учрашувда 18 очко ишлаган «қаймоқранглилар» турнир жадвалининг тўртинчи поғонасида бормоқда.
Клубнинг яқин вақтдаги натижалари Моуриньо тақдирида муҳим аҳамият касб этиши кутилмоқда. Жумладан, мадридликлар 18 октябрь куни ўз майдонида «Севилья»ни қабул қилади.
Эҳтимолий ўзгаришлар фонида Дешамнинг номи бежиз тилга олинмаяпти. 58 ёшли мураббий 2026 йилги мундиалдан кейин Франция миллий жамоасидаги фаолиятини якунлаган ва ҳозирча янги клуб билан шартнома имзоламаган.
Унинг мураббийлик фаолиятида бир қатор салмоқли ютуқлар мавжуд. Дешам Франция билан 2018 йилги жаҳон чемпионатида ғолиб чиққан, 2020/21 йилги УЕФА Миллатлар лигасида ҳам бош совринга эга бўлган.
Терма жамоадаги узоқ йиллик фаолиятидан аввал у «Монако», «Ювентус» ва «Марсель» клубларида ишлаган. Шу боис франциялик мутахассиснинг клуб футболига қайтиши эҳтимоли ҳам эътибор марказида турибди.
Шоҳжаҳон Эргашевнинг Тошкентдаги жанги жанжал билан ниҳоясига етди
Португалия футбол федерацияси Роналду бўйича ўз позициясини маълум қилди
Мбаппе Месси рекордини синдирди
